ബെന്‍സ് കാര്‍ കണ്ടാലും മോഷ്ടിക്കില്ല, പക്ഷേ, ലോഗോ കൊണ്ടുപോകും!
വെറുമൊരു മോഷ്ടാവ് ആയോരെന്നെ കള്ളന്‍ എന്നു വിളിച്ചില്ലേ എന്ന് പരാതി പറയുന്ന ഒരു കള്ളനെ കുറിച്ച് കവി അയ്യപ്പപണിക്കര്‍ എഴുതിയത് ഈ ചൈനീസ് കള്ളനെ മുന്‍കൂട്ടി കണ്ടിട്ടാണോ എന്നു തോന്നിപ്പോകും ഈ കള്ളന്റെ ചെയ്തികള്‍ അറിഞ്ഞാല്‍! ചൈനയിലെ ഒരു കള്ളന്‍ കാറിന്റെ കമ്പനി ലോഗോ മാത്രം ഊരിക്കൊണ്ടുപോകും,കാര്‍ മോഷ്ടിക്കില്ല!
25 വയസുകാരനായ ഈ കള്ളന്‍, ബെന്‍സ് കാറുകളില്‍ നിന്ന് ലോഗോ മോഷ്ടിക്കുക മാത്രമല്ല ചെയ്യുന്നത്. അത് ഊരി മാറ്റുന്ന വീഡിയോ എടുത്ത് ചൈനീസ് സോഷ്യല്‍ നെറ്റ്‌വര്‍ക്കിംഗ് സൈറ്റായ ടിക് ടോക്കില്‍ പോസ്റ്റ് ചെയ്യുകയും ചെയ്യും. എന്തൊരു പരോപകാരിയായ കള്ളന്‍ അല്ലേ?
മുമ്പ് ഇയാളുടെ ടിക് ടോക്ക് പോസ്റ്റുകളൊന്നും ആരും ശ്രദ്ധിച്ചിരുന്നില്ലത്രേ. അതില്‍ സങ്കടപ്പെട്ട് എങ്ങനെയെങ്കിലും പോസ്റ്റുകള്‍ക്ക് ലൈക്ക് കൂട്ടാന്‍ ഇയാള്‍ തീരുമാനിച്ചു. ബെന്‍സ് കാറുകളുമായി ബന്ധപ്പെട്ട പോസ്റ്റുകള്‍ക്ക് കൂടുതല്‍ ലൈക്കുകള്‍ കിട്ടുന്നുണ്ടെന്ന് മനസിലാക്കിയ യുവാവ് മറ്റുള്ളവരുടെ കാറുകളില്‍ നിന്ന് ഇവ ഊരിയെടുക്കുന്നതിന്റെ വീഡിയോ എടുക്കാന്‍ തീരുമാനിക്കുകയായിരുന്നു.
ഇതുവരെ 12 കാറുകളുടെ ലോഗോയാണ് ഇയാള്‍ ഊരിയെടുത്തത്. കാറുടമകള്‍ പരാതി നല്‍കിയതിനെ തുടര്‍ന്ന് നടത്തിയ അന്വേഷണത്തിലാണ് യുവാവ് വലയിലായത്. ഊരിയെടുത്ത ലോഗോകള്‍ ഇയാളുടെ വീട്ടില്‍ നിന്ന് കണ്ടെടുത്തു.ടിക് ടോക്കില്‍ പ്രശസ്തനാകാന്‍ മാത്രമായി മോഷ്ടിച്ച ഇയാളെ കള്ളനെന്ന് വിളിക്കണോ എന്ന് ആലോചിക്കേണ്ടിയിരിക്കുന്നു!
https://www.facebook.com/Malayalivartha
