തീ പിടിച്ച കാറില്‍ നിന്നും ഡ്രൈവറെ പുറത്തേയ്ക്ക് വലിച്ചെടുത്തത് വയോവൃദ്ധന്‍!
കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയ വീണ്ടും വീണ്ടും കാണാന്‍ ആഗ്രഹിക്കുന്ന ഒരു ദൃശ്യമാണിത്. കത്തിയമരുന്ന ഒരു വാഹനത്തില്‍ നിന്നും അതിലെ ഡ്രൈവറെ അതിസാഹസികമായി രക്ഷിക്കുന്ന ഒരു വയോധികനാണ് ദൃശ്യങ്ങളില്‍ ഉള്ളത്.
ജോസ് മാര്‍ട്ടിന്‍സ് എന്ന അമ്പത്തേഴുകാരനാണ് ആ വയോധികന്‍. കഴിഞ്ഞ മാര്‍ച്ച് 31-ന് അമേരിക്കയിലെ ഒറോറയിലാണ് അപകടം. തീപിടിച്ച് ആളിക്കത്തുന്ന വാഹനത്തിന്റെ അകത്തുനിന്നും ജോസ്, തനിക്ക് ജീവാപായം സംഭവിച്ചേക്കാം എന്നത് കണക്കാക്കാതെ ഡ്രൈവറെ വലിച്ച് പുറത്തിടുകയായിരുന്നു. സംഭവ സ്ഥലത്തെത്തിയ പൊലീസ് വാഹനത്തിന്റെ ഡാഷ് ക്യാമറയില്‍ പതിഞ്ഞ ദൃശ്യങ്ങളാണ് ഇപ്പോള്‍ വൈറലാകുന്നത്. പൊലീസ് തന്നെയാണ് സമൂഹമാധ്യമങ്ങളിലൂടെ ഈ ദൃശ്യങ്ങള്‍ പങ്കുവെച്ചത്.
അപകടം നടന്ന സ്ഥലത്തിനടുത്ത് താമസിക്കുന്ന ജോസ് മാര്‍ട്ടിന്‍സ് അപകടം നടന്നയുടന്‍ ഓടിയെത്തുകയായിരുന്നു. ഡെവിന്‍ ജോണ്‍സണ്‍ എന്ന മറ്റൊരു യുവാവും ജോസിനെ സഹായിക്കാനെത്തി എന്ന് പൊലീസ് വ്യക്തമാക്കി. എന്തായാലും ജോസിനെ അഭിനന്ദനങ്ങള്‍ കൊണ്ട് മൂടുകയാണ് സോഷ്യല്‍ മീഡിയ.
https://www.facebook.com/Malayalivartha
