10 മാസം പ്രായമുള്ള കുഞ്ഞ് ഓടിക്കൊണ്ടിരുന്ന വാഹനത്തില്‍ നിന്നും പുറത്തേക്ക് തെറിച്ചു വീണു. ഇപ്പോള്‍ സോഷ്യല്‍ മീഡിയയില്‍ വൈറലാകുന്ന ദൃശ്യങ്ങള്‍ ചൈനയില്‍ നടന്ന സംഭവത്തിന്റേതാണ്.

ഒരു വളവ് തിരിഞ്ഞു വരുന്ന വാനിന്റെ പിന്‍ഭാഗത്തെ ഡോര്‍ തനിയെ തുറക്കുന്നതും കുട്ടി റോഡിലേക്ക് തെറിച്ചു വീഴുന്നതും വീഡിയോയില്‍ വ്യക്തമാണ്. ഇതൊന്നും അറിയാതെ വാഹനം ചീറിപ്പാഞ്ഞു പോകുന്നതും കാണാം.

സംഭവം കണ്ട് ഓടിയെത്തിയ വഴിയാത്രക്കാരാണ് കുട്ടിയെ റോഡില്‍ നിന്നും വാരിയെടുക്കുന്നത്. ചീറിപ്പായുന്ന വാഹനങ്ങള്‍ പെട്ടെന്ന് നിര്‍ത്തുന്നതും വീഡിയോയില്‍ കാണാം.

അതേസമയം കുട്ടി നഷ്ടപ്പെട്ടതറിയാതെ വാഹനമോടിച്ച് ഏറെ ദൂരം മുന്നോട്ടു പോയ മാതാപിതാക്കള്‍ തിരികെയെത്തി കുഞ്ഞിനെ ആശുപത്രിയില്‍ പ്രവേശിപ്പിച്ചതായും കുട്ടി നിരീക്ഷണത്തിലാണെന്നുമാണ് റിപ്പോര്‍ട്ടുകള്‍.