ബെക്കിംഗ്ഹാം കൊട്ടാരത്തിലെത്തിയ പുത്തന്‍ അതിഥി ലൂയിസ് രാജകുമാരനെ താലോലിക്കുന്ന തിരക്കിലാണ് ബ്രിട്ടീഷ് രാജകുടുംബാംഗങ്ങളെല്ലാം.

കഴിഞ്ഞദിവസം കുഞ്ഞിന്റെ പേര് ലൂയിസ് എന്നാണെന്ന് ഔദ്യോഗികമായ അറിയിപ്പ് പുറത്തുവന്നു. ബ്രിട്ടീഷ് രാജകുടുംബത്തിന്റെ അടുത്ത സൃഹൃത്തായ ലൂയീസ് മൗണ്ട് ബാറ്റന്‍ പ്രഭുവിനെ അനുസ്മരിച്ചായിരുന്നുവത്രേ ഈ നാമകരണം.

കൊട്ടരം അധികൃതര്‍ കുഞ്ഞിന്റെ പേര് ഔദ്യോഗികമായി അറിയിച്ചതിനു തൊട്ടുപിന്നാലെ മറ്റൊരു കുഞ്ഞിനും ലൂയിസ് എന്നു പേരു വീണു. ഇംഗ്ലണ്ടിലെ ബ്ലാക് പൂള്‍ മൃഗശാലയിലെ ഒരു ഒട്ടകക്കുഞ്ഞിനാണ് അധികൃതര്‍ ബ്രിട്ടീഷ് രാജകുമാരന്റെ അതേ പേരു നല്‍കിയത്. കഴിഞ്ഞ തിങ്കളാഴ്ച ലൂയിസ് രാജകുമാരന്‍ പിറന്ന സമയത്തുതന്നെയാണ് ഈ ഒട്ടകക്കുഞ്ഞും ജനിച്ചത്.

അതാണ് ഒട്ടകക്കുഞ്ഞിനും ഇതേ പേരുതന്നെ നല്‍കാന്‍ കാരണം. രണ്ടു ലൂയിസുമാരുടെയും ചിത്രങ്ങള്‍ ചേര്‍ത്തുവച്ചുള്ള പോസ്റ്റുകള്‍ ബ്രിട്ടീഷ് സമൂഹമാധ്യമങ്ങളില്‍ വൈറലായതോടെ ലൂയിസ് ഒട്ടകക്കുഞ്ഞിനെ കാണാന്‍ തിരക്കേറിയതായി മൃഗശാലാ അധികൃതര്‍ അറിയിച്ചു.