നിഗൂഢമായ ചിരിയുമായി ആസ്വാദകരില്‍ കൗതുകമുണര്‍ത്തിയ ലിയനാര്‍ഡോ ഡാവിഞ്ചിയുടെ മോണാലിസ ചിത്രം വര്‍ഷങ്ങളെത്ര കഴിഞ്ഞാലും കലാസ്വാദകരെ വീണ്ടും വീണ്ടും ത്രസിപ്പിച്ചുകൊണ്ടേയിരിക്കും.അതുകൊണ്ടു തന്നെയാണ് ബ്രഷെടുക്കുന്നവരെല്ലാം ഒരു തവണ എങ്കിലും ആ ചിത്രമൊന്നു വരച്ച് ആദരവ് പ്രകടിപ്പിക്കാന്‍ ശ്രമിക്കുന്നത്. ആ ചിത്രം ഇതാ ഇപ്പോള്‍ വീണ്ടും വാര്‍ത്തയാകുന്നു. അത് ചിത്രമെന്ന നിലയ്ക്കല്ല, മോണാലിസ ജീവനോടെ മുന്നിലെത്തിയതിന്റെ പേരിലാണ്.

ചൈനയിലാണ് സംഭവം. കണ്ടാല്‍ ഫോട്ടോഷോപ് എന്നു തോന്നിക്കുന്ന വിധം ഒരു ബ്ലോഗര്‍ മെയ്ക് ഓവര്‍ നടത്തിയിരിക്കുകയാണ്. ചിത്രത്തില്‍നിന്ന് പുറത്തുവന്നു നില്‍ക്കുന്ന പോലത്തെ രൂപത്തിനു പിന്നില്‍ ഇരുപത്തേഴുകാരയായ ഹീ യുവ എന്ന യുവതിയാണ്. മുന്‍ മേയ്ക് അപ് കലാകാരിയായ ഇവര്‍ ഒറ്റയ്ക്കു തന്നെയാണ് മൊണാലിസയായി രൂപമാറ്റം വരുത്തിയത്. മെയ്ക് അപ് ചെയ്യുന്നത് ഷൂട്ട് ചെയ്ത് ഇവര്‍ സമൂഹ മാധ്യമങ്ങളില്‍ പോസ്റ്റ് ചെയ്തതോടെ സംഗതി വൈറലായി. മെയ്ക് അപ് സംബന്ധിച്ച് ബ്ലോഗ് എഴുതുന്നയാളാണ് ഹീ.

ആറു മണിക്കൂര്‍ കഷ്ടപ്പെട്ടാണ് ചിത്രത്തിലെ മൊണാലിസയുടെ മുഖത്തെ ഷേഡുകള്‍ പോലും യുവതി തന്റെ മുഖത്തു വരുത്തിയത്. കഠിനാധ്വാനത്തിനു ഫലം ലഭിച്ചതിന്റെ സന്തോഷത്തിലാണ് ഹീ യുവ. സമൂഹ മാധ്യമമായ മിയാ വോ പൈയില്‍ എട്ടുലക്ഷം പേരാണ് വിഡിയോ കണ്ടത്. ഡൗ യുനില്‍ 20 ദശലക്ഷത്തില്‍ അധികവും. ഹീ യുവയുടെ സമൂഹ മാധ്യമ സുഹൃത്തുക്കള്‍ തമാശ രൂപേണ നല്‍കിയ വെല്ലുവിളിയാണ് അവരെ മൊണാലിസ ചെയ്യാന്‍ പ്രേരിപ്പിച്ചത്. രൂപമാറ്റത്തിനു ലഭിച്ച സ്വീകരണത്തില്‍ നന്ദി പറയുന്ന യുവതി ഇത്രയധികം പേരിലെത്തുമെന്നു പ്രതീക്ഷിച്ചില്ലെന്നും അതിനാല്‍ താന്‍ അതീവ സന്തുഷ്ടയാണെന്നും ചൈനീസ് പത്രത്തോട് അറിയിച്ചു.

ഡാവിന്‍ചിയുടെ തന്നെ 'ലേഡി വിത് ഏന്‍ എര്‍മിന്‍' എന്ന ചിത്രത്തിനും ഇവര്‍ രൂപ ഭാഷ്യം നല്‍കിയിട്ടുണ്ട്. മുന്‍പ് പോപ്സ്റ്റാര്‍ ടെയ്‌ലര്‍ സ്വിഫ്റ്റായി മെയ്ക് ഓവര്‍ നടത്തിയതും ശ്രദ്ധിക്കപ്പെട്ടിരുന്നു. മൊണാലിസയുടെ കാര്യത്തില്‍ സംശയമുള്ളവര്‍ക്കു കാണാന്‍ ചൈനീസ് പത്രം മെയ്ക് ഓവര്‍ വിഡിയോകൂടി പോസ്റ്റ് ചെയ്തിട്ടുണ്ട്. രൂപമാറ്റങ്ങള്‍ ഹിറ്റാകുന്നതിനിടയിലും അടുത്ത രൂപമേത് വേണമെന്ന ആലോചനയിലാണ് ഹീ.