എഴുത്തു കാരിയും വാഗ്മിയുമൊക്കെയാണ് ജെയ്ന്‍ മാക്കറി എന്ന അമേരിക്കക്കാരി . അടുത്തിടെ അവര്‍ തായ്‌ലന്‍ഡിലെ വനങ്ങള്‍ സന്ദര്‍ശിക്കാന്‍ പോയി. അവിടെ ആനപ്പുറത്ത് സഞ്ചരിക്കാനുള്ള അവസരം സഞ്ചാരികള്‍ക്ക് ഒരുക്കിയിട്ടുണ്ട്.

ജെയിനിനായി ഒരുക്കിയിരുന്ന ആനയാകട്ടെ അടുത്തിടെ അമ്മ ആയ ആന ആയിരുന്നു. തന്റെ അമ്മയുടെ പുറത്തു കയറി ഒരാള്‍ സവാരി ചെയ്യുന്നത് കണ്ടു കുഞ്ഞാനയുടെ കുഞ്ഞുമനം നോവണ്ട എന്ന് കരുതി ഒരു മനഃശാസ്ത്ര പരമായ സമീപനം നടത്താന്‍ ജെയിന്‍ തീരുമാനിച്ചു. ആദ്യം അമ്മ ആനയുടെ കുഞ്ഞുമായി ചങ്ങാത്തത്തില്‍ ആകുക, പിന്നീട് അമ്മ-ആനപ്പുറത്ത് സഞ്ചാരം നടത്താം എന്നായിരുന്നു തീരുമാനം.

അതിനായി കുഞ്ഞാനയെ മടിയില്‍ കിടത്തി തട്ടുകയും തലോടുകയും ഒക്കെ ചെയ്ത് അതിനെ പുന്നാരിച്ചു. കുഞ്ഞാന ആകട്ടെ നല്ല സുഖത്തില്‍ സന്തോഷത്തോടെ മടിയില്‍ കിടന്നു ലാളന ഒക്കെ അനുഭവിച്ചു. അല്‍പനേരം കഴിഞ്ഞപ്പോള്‍ ജെയിന്‍ പോകാന്‍ എഴുന്നേറ്റപ്പോഴല്ലേ പൂരം. കുഞ്ഞാന അവളെ പോകാന്‍ വിടുന്നില്ല.

കുഞ്ഞിത്തുമ്പികൈ കൊണ്ട് ചുറ്റിപിടിച്ചു വയ്ച്ചു നോക്കി, അവളുടെ കാലിനിട്ട് ഒരു ചെറിയ കടിയും വച്ച് കൊടുത്തു. എന്നിട്ടും ജെയിന്‍ ഉരുണ്ടു പിരണ്ട് എഴുനേല്‍ക്കാന്‍ ശ്രമിയ്ക്കുന്നത് കണ്ട് പിന്നിലൂടെ വന്ന് അവളുടെ മുതുകത്തു ചവിട്ടി നിന്ന് കൊണ്ട് തുമ്പികൈ കൊണ്ട് കഴുത്തില്‍ ചുറ്റിപിടിച്ചു വച്ചു.

ഈ തമാശ ഒക്കെ അവള്‍ ആസ്വദിക്കുന്നുണ്ടെങ്കിലും അവള്‍ക്കു പോകണമല്ലോ, അതിന് ഒരു നിവൃത്തിയുമില്ലെന്ന് മനസ്സിലായ അവള്‍ ചിരിക്കിടയില്‍ ചോദിക്കുന്നുമുണ്ട്, ഇനി എന്ത് ചെയ്യാന്‍ പറ്റും എന്ന്. ഒടുവില്‍ ഒരു സഹായി എത്തി കുഞ്ഞാനയുടെ ശ്രദ്ധ അല്പം തിരിച്ച നേരത്ത് അവള്‍ ആന കാണാതെ എഴുന്നേല്‍ക്കുക ആയിരുന്നു!