മൂന്നടി ഉയരമുള്ള ഒരു മോഡലിനെ പറ്റി ചിന്തിക്കാനാവുമോ നിങ്ങള്‍ക്ക്? കേവലം മൂന്നടി നാലിഞ്ചുള്ള ഒരാള്‍ മോഡലിംഗ് പഠിക്കാന്‍ പോയാല്‍ എന്തായിരിക്കും ചുറ്റുമുള്ളവരുടെ പ്രതികരണം? എന്നാല്‍ മറ്റുള്ളവര്‍ എന്ത് പറയുന്നുവെന്നത് ഡ്രൂ പ്രെസ്റ്റ ശ്രദ്ധിക്കാന്‍ പോയില്ല. ആ മൂന്നടി നാലിഞ്ചുകാരി മോഡലിംഗ് കരിയര്‍ സ്വപ്‌നം കാണാനുള്ള തന്റേടം കാണിച്ചു. എല്ലാ വെല്ലുവിളികളെയും തരണം ചെയ്ത് ആ മേഖലയില്‍ വിജയം നേടുകയും ചെയ്തു.

മോഡലിംഗ് എന്ന സ്വപ്നം ഉള്ളില്‍ കൊണ്ടു നടന്നപ്പോഴും അതിന് വെല്ലുവിളിയായത് ഡ്രൂ പ്രിസ്റ്റയുടെ ഉയരമായിരുന്നു. എന്നാല്‍, തന്റെ വെല്ലുവിളികളെ തോല്‍പ്പിച്ച് മുന്നേറിയിരിക്കുകയാണ് ഈ കൊച്ചുസുന്ദരി. കേവലം മൂന്നടി നാലിഞ്ചാണ് ഡ്രൂ പ്രിസ്റ്റയുടെ ഉയരം. എന്നാല്‍ മോഡലിംഗ് രംഗത്ത് തിളങ്ങണമെന്ന മോഹം എല്ലാ വെല്ലുവിളികളെയും തരണം ചെയ്യാന്‍ അവളെ പ്രേരിപ്പിച്ചു. സ്വപ്നം യാഥാര്‍ഥ്യമാക്കാന്‍ തന്നെ ഡ്രൂ പ്രിസ്റ്റ തീരുമാനിച്ചു. അങ്ങനെ നെവേഡയില്‍ മോഡലിംഗ് പഠിക്കാന്‍ അവള്‍ തീരുമാനിച്ചു. എന്നാല്‍ അവിടെ ഉയരമില്ലാത്തത് കാരണം അവള്‍ തഴയപ്പെട്ടു. അപ്പോഴും ഡ്രൂ പ്രിസ്റ്റ തളര്‍ന്നില്ല. അവള്‍ നേരെ ലോസ് ഏഞ്ചല്‍സിലേക്ക് പറന്നു. മോഡലിംഗ് പഠിക്കാന്‍.

ലോസ് ആഞ്ചല്‍സില്‍ വച്ച് അവള്‍ മോഡലാകാന്‍ വേണ്ട എല്ലാ കാര്യങ്ങളും പഠിച്ചെടുത്തു. മാര്‍ക്കറ്റിംഗില്‍ ഡിഗ്രി എടുത്തതും അവിടെ നിന്നു തന്നെ. സത്യത്തില്‍ നെവേഡ എന്നത് ഒരു ചെറിയ സ്ഥലമായിരുന്നു. അവിടെ നിന്ന് ഒഴിവാക്കപ്പെട്ടത് ഒരു തരത്തില്‍ നല്ലതായി. അതുകൊണ്ടാണ് തനിക്ക് ലോസ് ഏഞ്ചല്‍സില്‍ എത്തി മോഡലിംഗ് പഠിക്കാന്‍ സാധിച്ചതെന്നും ഈ കൊച്ചുസുന്ദരി പറയുന്നു.

പലപ്പോഴും ഉയരം ഒരു വെല്ലുവിളിയായിട്ടുണ്ട്. എന്നാല്‍ അതൊരിക്കലും എന്റെ ആത്മവിശ്വാസം തകര്‍ക്കാന്‍ ഞാന്‍ അനുവദിച്ചില്ല. കഠിന പ്രയത്‌നത്തിലൂടെ പ്രതിസന്ധികളെ തരണം ചെയ്യാമെന്ന് പഠിച്ചു. ദൃഢ നിശ്ചയവും ആത്മവിശ്വാസവും ഉണ്ടെങ്കില്‍ ഒരു വൈകല്യവും വെല്ലുവിളിയാകില്ലെന്നും ഡ്രൂ പ്രെസ്റ്റ പറയുന്നു. ലോസ് ആഞ്ചല്‍സില്‍ അറിയപ്പെടുന്ന മോഡലുകളില്‍ ഇപ്പോള്‍ ഈ കൊച്ചു സുന്ദരിയുടെ പേരും ഇടം പിടിച്ചിരിക്കുകയാണ്.