ബ്രിട്ടനിലെ ഏറ്റവും വലിയ കുടുംബം എന്ന പേരില്‍ പ്രസിദ്ധമായ റാഡ്‌ഫോര്‍ഡ് കുടുംബത്തില്‍ നിന്നും പുതിയ വാര്‍ത്ത എത്തിയിരിക്കുന്നു. കുടുംബത്തില്‍ 21 -ാമത്തെ അതിഥി എത്താന്‍ പോകയാണെന്നാണ് വീഡിയോ മെസ്സേജ്.

ഇക്കഴിഞ്ഞ സെപ്റ്റംബറിലാണ് 43-കാരിയായ സ്യു 20 -ാമത്തെ കുഞ്ഞിനെ പ്രസവിച്ചത്. അന്ന് അത് അവരുടെ അവസാന കുഞ്ഞ് ആയിരിക്കും എന്നാണ് പറഞ്ഞിരുന്നത്. എന്നാല്‍ അപ്രതീക്ഷിതമായാണ് 21-ാമതും ഗര്‍ഭം ധരിച്ചതെന്ന് പറഞ്ഞുകൊണ്ട് പുറത്തു വിട്ട വിഡിയോയില്‍ ഗര്‍ഭാവസ്ഥയില്‍ നടത്തിയ സ്‌കാനിന്റെ ചിത്രവും നല്‍കിയിരുന്നു.

പൊന്നു കുഞ്ഞേ നിന്നെ സ്വാഗതം ചെയ്യാന്‍ അക്ഷമയോടെ കാത്തിരിക്കുകയാണ് ഞങ്ങള്‍ എല്ലാം, അനുഗ്രഹിക്കപ്പെട്ടവരാണ് ഞങ്ങള്‍... എന്നാണ് 47-കാരനായ ഭര്‍ത്താവ് നോയല്‍ എഴുതിയിരുന്നത്. ആശുപത്രിയില്‍ നിന്ന് തിരികെ എത്തിയതിന് ശേഷം കുഞ്ഞ് ആണാണോ പെണ്ണാണോ എന്ന് വെളിപ്പെടുത്താനായി ജന്‍ഡര്‍ റിവീല്‍ പാര്‍ട്ടി സംഘടിപ്പിച്ചിരുന്നു. ഇപ്പോള്‍ ഗര്‍ഭത്തിലുള്ള 21-ാമത്തെ കുഞ്ഞ് പെണ്‍കുഞ്ഞാണെന്ന് അറിയിക്കാന്‍ പിങ്ക് നിറത്തിലുള്ള കണ്‍ഫെറ്റി പറത്തുകയാണ് ചെയ്തത്.

സാധാരണയായി കുഞ്ഞ് ആണാണോ പെണ്ണാണോ എന്നതിനെ കുറിച്ച് തനിക്കൊരു ചെറിയ മുന്നറിവ് പോലൊരു തോന്നല്‍ ഉണ്ടാവാറുണ്ടെന്നും ഇത്തവണ കുഞ്ഞ് ആണാണെന്നാണ് താന്‍ വിചാരിച്ചിരുന്നതെന്നും സ്യു പിന്നീട് പറഞ്ഞു. 11-ാമത്തെ മകനെ പ്രസവിച്ചപ്പോള്‍ ഒരു ഒറ്റ സംഖ്യയില്‍ വച്ച് പ്രസവം നിര്‍ത്തുന്നത് നല്ലൊരു കാര്യമാണെന്നാണ് താന്‍ വിചാരിക്കുന്നതെന്ന് സ്യു പറഞ്ഞിരുന്നു.

സ്യു വിന് ഏഴ് വയസ്സുള്ളപ്പോഴാണ് നോയലുമായി പരിചയത്തിലായത്. 28 വര്‍ഷം മുന്‍പ് സ്യു വിന് 14 വയസ്സുള്ളപ്പോഴാണ് അവരുടെ ആദ്യ കുഞ്ഞ് ജനിച്ചത്. സ്യു വിനേയും നോയലിനെയും അവര്‍ ജനിച്ച ഉടനെ തന്നെ അവരുടെ മാതാപിതാക്കള്‍ ദത്തു നല്‍കിയതായിരുന്നു. അതിനാല്‍ കൗമാര പ്രായത്തില്‍ പ്രസവിച്ചതാണെങ്കിലും തങ്ങളുടെ കുഞ്ഞിനെ വളര്‍ത്താന്‍ തന്നെ ഇരുവരും തീരുമാനിക്കുകയായിരുന്നു. പിന്നീട് അല്‍പ കാലം കഴിഞ്ഞ് അവര്‍ ഒരു പുതിയ വീട് വാങ്ങി അവിടേക്കു താമസം മാറി. സ്യു വിന് 17 വയസ്സുള്ളപ്പോഴായിരുന്നു രണ്ടാമത്തെ കുഞ്ഞ് ജനിച്ചത്.

സ്യു വും നോയലും മുത്തച്ഛനും മുത്തശ്ശിയുമാണ്. അവരുടെ മകള്‍ സോഫിക്ക് മൂന്ന് മക്കളുണ്ട്. 240000 പൗണ്ട് വിലയുള്ള ഒരു വീട്ടിലാണ് ദമ്പതികള്‍ ഇപ്പോള്‍ കഴിയുന്നത്. 11 വര്‍ഷം മുന്‍പാണ് 2 കോടിയിലധികം ഇന്ത്യന്‍ രൂപയ്ക്ക് തുല്യമായ വിലയുള്ള ഈ വീട് അവര്‍ വാങ്ങിയത്.

സ്യു 9 -ാമത്തെ കുഞ്ഞിനെ ഗര്‍ഭം ധരിച്ചിരുന്നപ്പോള്‍ നോയല്‍ ഗര്‍ഭ നിയന്ത്രണത്തിനുള്ള വാസക്ടമി ശസ്ത്രക്രിയ നടത്തിയിരുന്നു. എന്നാല്‍ തങ്ങള്‍ക്ക് വീണ്ടും കുഞ്ഞുങ്ങള്‍ വേണമെന്ന് തോന്നിയതിനാല്‍ അതിനായി വീണ്ടും ശസ്ത്രക്രിയ ചെയ്യുക ആയിരുന്നു .