കഴിഞ്ഞ ദിവസം ആഗ്രയിലെ ഒരു ബാങ്കില്‍ 1,40,000 രൂപ നിക്ഷേപിക്കാനെത്തിയ വിജയ് ബന്‍സാല്‍ എന്ന വ്യാപാരിയുടേയും മകളുടെയും കൈയില്‍ നിന്ന് പണം കവര്‍ന്നത് ഒരു കുരങ്ങനായിരുന്നു.

വിജയിയുടെ മകളാണ് , പണം ഒരു പോളിത്തീന്‍ കവറിലാക്കി കൈയില്‍ സൂക്ഷിച്ചിരുന്നത്. ബാങ്കിന്റെ സമീപത്തായി കുറേ കുരങ്ങന്മാര്‍ നില്‍പ്പുണ്ടായിരുന്നു. വിജയിയും മകളും ബാങ്കിലേക്ക് കയറാന്‍ തുടങ്ങിയപ്പോള്‍ ചുറ്റിത്തിരിഞ്ഞ് നടന്നതില്‍ ഒരു കുരങ്ങ് ഓടിവന്ന് കവര്‍ തട്ടിയെടുത്ത് പോകുകയായിരുന്നു. കവറുമായി അടുത്തുള്ള മരത്തില്‍ കയറിയ കുരങ്ങന്‍ കവര്‍ വലിച്ചുകീറി 60,000 രൂപ ചുറ്റും വാരി വിതറി.

വിജയിയും മകളും ഓടിയെത്തി ഇത് പെറുക്കിയെടുത്തു. എന്നാല്‍ ബാക്കി തുക തിരിച്ചുതരാന്‍ കുരങ്ങന്‍ തയാറായില്ല. പോലീസെത്തി വിരട്ടിയപ്പോള്‍ കുരങ്ങന്‍ കാട്ടിലേക്ക് കടന്നു. കുറേ സമയം തെരച്ചില്‍ നടത്തിയെങ്കിലും കുരങ്ങനെയോ പണമോ കണ്ടെത്താനായിട്ടില്ല. ഇതിനിടെ പണം കുരങ്ങന്‍ കൊണ്ടുപോയി എന്ന പരാതിയുമായി വിജയ് പോലീസ് സ്‌റ്റേഷനിലെത്തി. എന്നാല്‍ ആര്‍ക്കെതിരേ കേസെടുക്കണമെന്നറിയാതെ വിഷമിക്കുകയാണ് പോലീസ്.