ഞായറാഴ്ചത്തെ വിശ്രമത്തിനൊക്കെ ശേഷം തിങ്കളാഴ്ച രാവിലെ കുട്ടികളെ ഉണര്‍ത്തി തയ്യാറാക്കി സ്‌കൂളില്‍ അയയ്ക്കുന്നത് എത്ര ബുദ്ധിമുട്ടുള്ള പണിയാണെന്ന് അത് ചെയ്തിട്ടുള്ളവര്‍ക്കെല്ലാം അറിയാം. കിടക്കയില്‍ നിന്ന് അവരെ ഒന്ന് എഴുന്നേല്‍പ്പിച്ചെടുക്കാന്‍ എത്ര തവണ തട്ടിവിളിക്കണമെന്നതിന് ഒരു കണക്കുമില്ല. ഇത് കുഞ്ഞുങ്ങളുടെ പൊതുസ്വഭാവം ആണെന്നും മനുഷ്യവര്‍ഗ്ഗത്തിലെ കുഞ്ഞുങ്ങള്‍ മാത്രമല്ല, മൃഗങ്ങള്‍ക്കിടയിലും ഇതൊക്കെ തന്നെയാണ് അവസ്ഥ എന്നും ചൈനയില്‍ നിന്നുള്ള ഈ വീഡിയോ കണ്ടാല്‍ ആരും സമ്മതിച്ചുതരും.

ഇക്കഴിഞ്ഞ തിങ്കളാഴ്ച രാവിലെ ഒരു പാണ്ടക്കുട്ടിയെ തട്ടി ഉണര്‍ത്താന്‍ ശ്രമിക്കുന്ന മൃഗശാല ജീവനക്കാരിയുടെ ദൃശ്യങ്ങളാണ് സമൂഹമാധ്യമങ്ങളില്‍ ഇപ്പോള്‍ വൈറലാകുന്നത്. രാവിലെ ഭക്ഷണം കഴിക്കാനാണ് പാണ്ടക്കുട്ടനെ വിളിക്കുന്നത്. എന്നാല്‍ തന്റെ സുന്ദരമായ ഉറക്കം അവസാനിപ്പിക്കാന്‍ അവന്‍ തയാറാകുന്നില്ല. രണ്ടുമൂന്നുവട്ടം തിരിഞ്ഞും മറിഞ്ഞും കിടക്കുന്നതല്ലാതെ ആളൊന്ന് കണ്ണു തുറക്കുന്നുപോലുമില്ല.

ഒടുവില്‍ മൃഗശാല ജീവനക്കാരി പാണ്ടയെ ഉണര്‍ത്താനുള്ള തന്റെ ശ്രമമുപേക്ഷിച്ച് മടങ്ങുകയാണ്. ഒന്നരമിനിറ്റ് ദൈര്‍ഘ്യമുള്ള ഈ ദൃശ്യങ്ങള്‍ ചൈനയില്‍ നിന്നുള്ളതാണ്. വീഡിയോയ്ക്ക് ലഭിക്കുന്ന കമന്റുകളും വളരെ രസകരമാണ്.

പാണ്ടയെ കണ്ടിട്ട് തിങ്കളാഴ്ചകളില്‍ രാവിലെ എഴുന്നേല്‍ക്കാന്‍ മടിക്കുന്ന തങ്ങളെത്തന്നെയാണ് ഓര്‍മ വരുന്നതെന്ന് ചിലര്‍ കമന്റ് ചെയ്തിരിക്കുന്നു. പാണ്ടയെ അതിന്റെ ഉറക്കം തുടരാന്‍ മൃഗശാല ജീവനക്കാരി അനുവദിച്ചതുപോലെ തങ്ങളെയും ഉറക്കം തുടരാന്‍ അമ്മമാര്‍ അനുവദിക്കണമെന്നാണ് മറ്റു ചിലരുടെ വാദം.