ന്യൂസിലാന്റ് പ്രധാനമന്ത്രി ജസീന്ദ ആര്‍ഡന് പെണ്‍കുഞ്ഞ് പിറന്നു. ഓക്ക്‌ലാന്റ് സിറ്റിയിലെ ആശുപത്രിയില്‍ പ്രാദേശിക സമയം പുലര്‍ച്ചെ 4.45-നായിരുന്നു പെണ്‍കുഞ്ഞിന് ജന്‍മം നല്‍കിയത്.

ലോകത്ത ്പ്രധാനമന്ത്രി പദത്തിലിരിക്കെ അമ്മയാകുന്ന രണ്ടാമത്തെയാളാണ് ജസീന്ദ. 1990-ല്‍ പാക് പ്രധാനമന്ത്രിയായിരിക്കെ അമ്മയായ ബേനസീര്‍ ഭൂട്ടോയാണ് ആദ്യത്തെയാള്‍. യാദൃച്ഛികമെന്നപോലെ ബേനസീര്‍ ഭൂട്ടോയൂടെ ജന്‍മദിനത്തിലാണ് ജസീന്ദയുടെ മകളുടെ ജനനവും.

അമ്മയായ വിവരം പ്രധാനമന്ത്രി തന്നെയാണ് സമൂഹ മാധ്യമങ്ങളിലൂടെ പുറത്തു വിട്ടത്. 37-കാരിയായ ജസീന്ദയാണ് 1856-ന് ശേഷം രാജ്യത്തെ ഏറ്റവും പ്രായം കുറഞ്ഞ പ്രധാനമന്ത്രി. കഴിഞ്ഞ ഒക്‌ടോബറിലാണ് പ്രധാനമന്ത്രിയായി തെരഞ്ഞെടുക്കപ്പെട്ടത്. ജനുവരിയിലാണ് താനും പങ്കാളി ക്ലാര്‍ക്ക് ഗേഫോര്‍ഡും മാതാപിതാക്കളാകാന്‍ പോകുന്നുവെന്നകാര്യം ജസീന്ദ പുറം ലോകത്തെ അറിയിച്ചത്.

ആറുമാസത്തെ പ്രസവാവധിയിലായിരുന്നു പ്രധാനമന്ത്രി. നിലവില്‍ ഔദ്യോഗിക ചുമതലകള്‍ ഉപപ്രധാന മന്ത്രി വിന്‍സണ്‍ പീറ്ററിനെയാണ് ഏല്‍പ്പിച്ചിരിക്കുന്നത്. ന്യൂസിലന്റ് മുന്‍പ്രധാനമന്ത്രി ഹെലന്‍ ക്ലാര്‍ക്കും ഓസ്‌ട്രേലിയന്‍ പ്രധാനമന്ത്രി മാല്‍ക്കം ടേണ്‍ബുള്ളും ജസീന്തയ്ക്ക് ആശംസ അര്‍പ്പിച്ചിട്ടുണ്ട്‌.