ജൂണ്‍ 28 മുതല്‍ ജൂലൈ 4 വരെ നടക്കുന്ന ലണ്ടന്‍ ആര്‍ട്ട് ഫെയറില്‍ പ്രദര്‍ശനത്തിനെത്തുന്ന ഒരു മേശ ഇപ്പോഴേ വാര്‍ത്തയാകുന്നു. 1568-ല്‍ നിര്‍മാണം പൂര്‍ത്തിയായ ഈ മേശയ്ക്ക് നിരവധി പ്രത്യേകതകളുണ്ട്. പ്രശസ്ത ഇറ്റാലിയന്‍ കലാകാരനും ശില്പിയുമൊക്കെയായിരുന്ന ജിയോര്‍ജിയോ വസാരിയാണ് ഈ മേശ രൂപകല്പ്പന ചെയ്തതെന്നതാണ് ഈ മേശയുടെ ഏറ്റവും വലിയ പ്രത്യേകത. ഈ മേശ സ്വന്തമാക്കണമെന്ന് തോന്നുന്നുണ്ടെങ്കില്‍ 78 കോടി രൂപ നല്‍കിയാല്‍ മതി.

16-ാം നൂറ്റാണ്ടിലെ ആ കാലഘട്ടത്തില്‍ ഇറ്റലിയിലെ ഏറ്റവും മൂല്യമേറിയ ശില്‍പ്പിയായിരുന്നു വസാരി. ഇറ്റലിയിലെ രാജകുടുംബത്തിന്റെ ആവശ്യപ്രകാരമാണ് മേശ നിര്‍മിച്ചത്. രാജകുടുംബം പുതിയതായി ഒരു അവധിക്കാല വസതി നിര്‍മിക്കാന്‍ തീരുമാനിച്ചപ്പോള്‍ അവിടേക്കാവശ്യമായ മുഴുവന്‍ ഫര്‍ണിച്ചറുകളുടെയും പെയിന്റിംഗുകളുടെയും നിര്‍മാണ ചുമതല വസാരിക്കായിരുന്നു. വസാരി തന്നെ വികസിപ്പിച്ചെടുത്ത ഒരു പ്രത്യേക രീതി അനുസരിച്ചാണ് മേശ നിര്‍മിച്ചത്.

വളരെ വിലകൂടിയ, അപൂര്‍വ്വങ്ങളായ നിരവധി കല്ലുകള്‍ ഉപയോഗിച്ചാണ് മേശയുടെ നിര്‍മാണം. വെളുത്ത മാര്‍ബിളിന്റെ മുകളില്‍ ജാസ്‌പെറും ലാപിസ് ലസൂലിയും പോലൂള്ള കല്ലുകള്‍ മനോഹരമായി കൊത്തിയെടുത്ത് അലങ്കരിച്ചിരിക്കുന്നു.

പത്തുവര്‍ഷമെടുത്താണ് ഈ മേശയുടെ നിര്‍മാണം പൂര്‍ത്തിയാക്കിയത്. ഇതിന്റെ ചെലവ് എത്രയാണെന്നതിനെക്കുറിച്ച് കൃത്യമായ വിവരങ്ങള്‍ ലഭ്യമല്ല. എന്നാല്‍ അക്കാലത്ത് ഇതിന്റെ നിര്‍മാണ ചെലവ് തീര്‍ച്ചയായും ഒരു റിക്കാര്‍ഡായിരിക്കാമെന്ന് പുരാവസ്തു ശാസ്ത്രജ്ഞര്‍ പറയുന്നു.

400 വര്‍ഷം പഴക്കമുണ്ടെങ്കിലും മേശയ്ക്ക് യാതൊരു കേടുപാടും സംഭവിച്ചിട്ടില്ല. ഊരി മാറ്റാന്‍ കഴിയുന്ന വെള്ളിയില്‍ തീര്‍ത്ത കാലുകളും മേശയ്‌ക്കൊപ്പം ലഭിക്കും. ലണ്ടന്‍ ആര്‍ട്ട് ഫെയറിലാണ് മേശ ലേലത്തില്‍ വയ്ക്കുന്നത്. അഞ്ചടി നീളവും മൂന്നര അടി വീതിയുമാണ് ഈ മേശയ്ക്കുള്ളത്. രാജകുടംബത്തിന്റെ വേനല്‍ക്കാല വസതിയിലെ സ്വീകരണമുറിയെ അലങ്കരിച്ചിരുന്നതാണ് ഈ മേശ.