ആസ്‌ട്രേലിയന്‍ ക്രിക്കറ്റര്‍ ഫിലിപ്പ് ഹ്യൂഗ്‌സിന്റെ മരണത്തെ തുടര്‍ന്ന് ഇന്ത്യയും ക്രിക്കറ്റ് ആസ്‌ട്രേലിയ ഇലവനും തമ്മില്‍ വെള്ളിയാഴ്ച നടക്കാനിരുന്ന രണ്ടാം സന്നാഹ മത്സരം ഉപേക്ഷിച്ചു. ചൊവ്വാഴ്ച ആരംഭിക്കാനിരിക്കുന്ന ആദ്യ ടെസ്റ്റ് പരമ്പരയുടെ കാര്യത്തിലും ഇനി വ്യക്തത വന്നിട്ടില്ല.
ആഭ്യന്തര ക്രിക്കറ്റ് ലീഗ് മത്സരത്തിനിടെ എതിരാളിയുടെ ബൗണ്‍സര്‍ തലയ്ക്കുകൊണ്ട് രണ്ടു ദിവസമായി ഗുരുതരാവസ്ഥയില്‍ ആശുപത്രിയില്‍ കഴിഞ്ഞിരുന്ന ഫിലിപ്പ് ഹ്യൂസ് വ്യാഴാഴ്ച ഉച്ചയ്ക്കാണ് അന്ത്യശ്വാസം വലിച്ചത്. കളിക്കളത്തില്‍ ഏറേറ്റ് വീണ ഹ്യൂസിനെ ആശുപത്രിയിലെത്തിച്ച് അടിയന്തര ശസ്ത്രക്രിയയ്ക്ക് വിധേയനാക്കിയശേഷം നിര്‍ബന്ധിത കോമാ സ്ഥിതിയില്‍ കിടത്തിയിരിക്കുകയായിരുന്നു. കാറപകടത്തില്‍ ഏല്‍ക്കുന്നതിന് തുല്യമായ പരിക്കാണ് ഹ്യൂസിന്റെ തലച്ചോറിലേറ്റതെന്ന് ഡോക്ടര്‍മാര്‍ അറിയിച്ചു.