പാകിസ്ഥാന്‍ ക്രിക്കറ്റ് താരം ഹാരിസ് സൊഹയ്ല്‍ പ്രേത\'ത്തെ കണ്ടു ഭയന്നു നിലവിളിച്ചു കരഞ്ഞതായി റിപ്പോര്‍ട്ട്. ക്രൈസ്റ്റ് ചര്‍ച്ചിലെ ഹോട്ടലിലാണ് സംഭവം. ഉറങ്ങിക്കിടക്കുകയായിരുന്ന സൊഹ്‌യലിന്റെ കിടക്ക വന്‍ ശബ്ദത്തോടെ കുലുങ്ങുകയായിരുന്നു. ഞെട്ടി ഉണര്‍ന്ന സൊഹയ്ല്‍ ഭയന്നു വിറച്ച് ടീം മാനേജ്‌മെന്റിനെ സഹായത്തിനായി ഫോണില്‍ വിളിച്ചു. അവരെത്തുമ്പോള്‍ സൊഹയ്ല്‍ ആലില പോലെ വിറയ്ക്കുകയായിരുന്നു. ഉടന്‍ തന്നെ സൊഹയ്‌ലിനെ ആശുപത്രിയിലേക്ക് മാറ്റി. ദു:സ്വപ്നം വല്ലതും കണ്ടതായിരിക്കാമെന്ന് പറഞ്ഞ് കോച്ച്, സൊഹയ്‌ലിനെ ആശ്വസിപ്പിക്കാന്‍ ശ്രമിച്ചെങ്കിലും ഫലമുണ്ടായില്ല. താന്‍ കണ്ടത് പ്രേതത്തെയാണെന്ന ഉറച്ച നിലപാടിലാണ് അദ്ദേഹം.
ഇതാദ്യമായല്ല ക്രിക്കറ്റ് കളിക്കാര്‍ പ്രേതത്തെ കണ്ടതായി പറയുന്നത്. ഇംഗ്‌ളണ്ടിന്റെ ഫാസ്റ്റ് ബൗളര്‍ സ്റ്റുവര്‍ട്ട് ബ്രോഡിന് ലണ്ടനിലെ ലാംഗാം ഹോട്ടലില്‍ വച്ച് ഒരു വര്‍ഷം മുന്‍പ്‌ സമാനമായ അനുഭവം ഉണ്ടായിരുന്നു. ബ്രോഡ് താമസിച്ചിരുന്ന ഹോട്ടലിലെ പൈപ്പുകള്‍ തനിയെ തുറക്കുകയായിരുന്നു. ലൈറ്റിട്ടതോടെ പൈപ്പുകള്‍ തനിയെ നിന്നു. ലൈറ്റ് അണച്ചതോടെ പൈപ്പ് വീണ്ടും തുറന്ന് വെള്ളം വരാന്‍ തുടങ്ങി. 2005ല്‍ ആസ്‌ട്രേലിയന്‍ ഓള്‍റൗണ്ടര്‍ ഷെയ്ന്‍ വാട്‌സന്‍ ലണ്ടനില്‍ വച്ച് തന്റെ മുറിയില്‍ പ്രേതം കയറിയെന്ന് പറഞ്ഞ് നിലവിളിച്ചു കൊണ്ട് മുന്‍ താരം ബ്രെറ്റ് ലീയുടെ മുറിയിലേക്ക് ഓടിക്കയറിയിരുന്നു.
സൊഹയ്ല്‍ മാനസികമായി തകര്‍ന്ന അവസ്ഥയിലാണെന്നും അതിനാല്‍ തന്നെ ന്യൂസിലന്‍ഡിനെതിരായ ഏകദിനത്തിന് മുമ്പുള്ള പരിശീലന മത്സരം കളിക്കാന്‍ കഴിയുമോയെന്ന കാര്യം സംശയത്തിലാണെന്നും പാകിസ്ഥാനിലെ മാദ്ധ്യമങ്ങള്‍ റിപ്പോര്‍ട്ട് ചെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha