ബ്രണ്ടന്‍ മക്കല്ലത്തിന്റെ വെടിക്കെട്ട് ബാറ്റിങും ടിം സൗത്തിയുടെ മാരക ബൗളിങും ഒന്നിച്ചപ്പോള്‍ ലോകകപ്പ് കിരീട പ്രതീക്ഷയുമായി വന്ന ഇംഗ്‌ളീഷ് പടക്ക് ദയനീയ തോല്‍വി. 25 പന്തില്‍ നിന്നും 77 റണ്‍സെടുത്ത ബ്രണ്ടന്‍ മക്കലവും എഴ് വിക്കറ്റ് വീഴ്ത്തിയ ടിം സൗത്തിയുമാണ് ഇംഗ്‌ളീഷുകാര്‍ക്ക് കനത്ത പ്രഹരമേല്‍പിച്ചത്. ഇംഗ്‌ളണ്ട് ഉയര്‍ത്തിയ 123 റണ്‍സ് 8 വിക്കറ്റ് ശേഷിക്കെ 12.2 ഓവറില്‍ കിവീസ് മറികടന്നു. മാര്‍ട്ടിന്‍ ഗുപ്ട്ടില്‍(22), കെയ്ന്‍ വില്യംസണ്‍ (9), റോസ് ടെയ്‌ലര്‍ (5) എന്നിവരാണ് കിവീസിന്റെ മറ്റു സ്‌കോറര്‍മാര്‍.
നേരത്തേ ആദ്യം ബാറ്റിങിനിറങ്ങിയ ഇംഗ്‌ളിഷ് പടക്ക് വന്‍ ബാറ്റിങ് തകര്‍ച്ചയാണുണ്ടായത്. മത്സരത്തില്‍ 33.2 ഓവറില്‍ 123 റണ്‍സിന് ഇംഗ്‌ളീഷുകാര്‍ ഓള്‍ ഔട്ടാവുകയായിരുന്നു. 46 റണ്‍സെടുത്ത ജോ റൂട്ടിനു മാത്രമാണ് ക്രീസില്‍ പിടിച്ചു നില്‍ക്കാനായത്.
ഇയാന്‍ബെല്‍ (8), മോയിന്‍ അലി(20), ഗാരി ബാലന്‍സ് (10), മോര്‍ഗന്‍ (17), ജോസ് ബട്ട്‌ലര്‍ (3), ക്രിസ് വോക്കസ്(1), സ്റ്റുവര്‍ട്ട് ബ്രോഡ് (4), ജെയിംസ് ആന്‍ഡേഴ്‌സണ്‍ (1) എന്നിവരെല്ലാം വന്ന പോലെ തന്നെ മടങ്ങുകയായിരുന്നു. സ്റ്റീവന്‍ ഫിന്‍, ജെയിംസ് ടെയ്‌ലര്‍ എന്നിവര്‍ സംപൂജ്യരായാണ് മടങ്ങിയത്. ഇയാന്‍ബെല്‍, മോയിന്‍ അലി, ജെയിംസ് ടെയ്‌ലര്‍, ജോസ് ബട്ട്‌ലര്‍, ക്രിസ് വോക്കസ്, സ്റ്റുവര്‍ട്ട് ബ്രോഡ്, സ്റ്റിവന്‍ ഫിന്‍ എന്നിവരെയാണ് സൗത്തീ മടക്കിയയച്ചത്.;