വെസ്റ്റ് ഇന്‍ഡീസ് ബൗളര്‍മാര്‍ക്കെതിരെ മിന്നല്‍പ്പിണറായി ന്യൂസിലാന്‍ഡിന്റെ മാര്‍ട്ടിന്‍ ഗുപ്റ്റില്‍. ഓപ്പണര്‍ മാര്‍ട്ടിന്‍ ഗുപ്റ്റില്‍ നേടിയ തകര്‍പ്പന്‍ ഇരട്ട സെഞ്ചുറിയുടെ പിന്‍ബലത്തില്‍ വെസ്റ്റ് ഇന്‍ഡീസിനെതിരായ നാലാം ക്വാര്‍ട്ടര്‍ ഫൈനലില്‍ ന്യൂസിലന്‍ഡിന് കൂറ്റന്‍ സ്‌കോര്‍. നിരവധി റിക്കാര്‍ഡുകളാണ് ഗുപ്റ്റില്‍ ഒറ്റ ഇന്നിംഗ്‌സിലൂടെ നേടിയത്. ലോകകപ്പിലെ ഏറ്റവും ഉയര്‍ന്ന വ്യക്തിഗത സ്‌കോറും ഏകദിനത്തിലെ രണ്ടാമത്തെ ഉയര്‍ന്ന വ്യക്തിഗത സ്‌കോറും ഗുപ്റ്റിലിന്റെ പേരിലായി. ന്യൂസിലന്‍ഡ് താരം ഏകദിനത്തില്‍ നേടുന്ന ആദ്യ ഇരട്ട സെഞ്ചുറിയാണിത്.
ആദ്യം ബാറ്റ് ചെയ്ത കിവീസ് 50 ഓവറില്‍ ആറ് വിക്കറ്റിന് 393 റണ്‍സ് അടിച്ചുകൂട്ടി. 163 പന്തില്‍ 24 ഫോറും 11 സിക്‌സും ഉള്‍പ്പടെ 237 റണ്‍സ് നേടിയ ഗുപ്റ്റില്‍ പുറത്താകാതെ നിന്നു.
റോസ് ടെയ്‌ലര്‍ (42), കെയ്ന്‍ വില്യംസണ്‍ (33), ഗ്രാന്റ് എലിയട്ട് (27) എന്നിവര്‍ ഗുപ്റ്റിലിന് പിന്തുണ നല്കി. വിന്‍ഡീസ് നിരയില്‍ ബൗളര്‍മാരെല്ലാം റണ്‍സ് വിട്ടുകൊടുക്കുന്നതില്‍ ഒരു പിശുക്കും കാണിച്ചില്ല. എട്ട് ഓവറില്‍ 38 റണ്‍സ് മാത്രം വഴങ്ങിയ ഡാരന്‍ സമി മാത്രമാണ് ആറ് റണ്‍സ് ശരാശരിയില്‍ താഴെ പന്തെറിഞ്ഞത്. ആന്ദ്രേ റസല്‍ 10 ഓവറില്‍ 96 റണ്‍സ് വഴങ്ങിയപ്പോള്‍ ജെറാം ടെയ്‌ലറുടെ ഏഴ് ഓവറില്‍ കിവീസ് ബാറ്റ്‌സ്മാന്‍മാര്‍ 71 റണ്‍സ് അടിച്ചുകൂട്ടി. ടെയ്‌ലര്‍ മൂന്നും റസല്‍ രണ്ടും വിക്കറ്റുകള്‍ നേടി.
മത്സരത്തിലെ വിജയികള്‍ 24ന് ഓക്‌ലന്‍ഡില്‍ നടക്കുന്ന ആദ്യ സെമിഫൈനലില്‍ ദക്ഷിണാഫ്രിക്കയെ നേരിടും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha