കാനനവാസം കഴിഞ്ഞ്‌ ശ്രീശാന്ത്‌ ശബരിമലയില്‍ വന്ന്‌ അയ്യപ്പനെ കണ്ടു വണങ്ങി. സന്നിധാനത്ത്‌ ശയന പ്രദക്ഷിണവും നടത്തി. മുമ്പ് തന്റെ കൈയ്യില്‍ നിന്ന് ചെറിയ തെറ്റുകള്‍ സംഭവിച്ചിട്ടുണ്ടെന്നും എന്നാല്‍ ഇപ്പോഴത്തെ വാതുവെപ്പുമായി തനിക്ക് യാതൊരു ബന്ധവുമില്ലന്നും ക്രിക്കറ്റ് താരം ശ്രീശാന്ത് പറഞ്ഞു. തെറ്റുകള്‍ക്കുള്ള പ്രായശ്ചിത്തമായാണ് ശബരിമല ദര്‍ശനം. ശബരിമലയില്‍ എത്താന്‍ കഴിഞ്ഞത് തന്റെ ഭാഗ്യമാണ്. പുതിയൊരു ശ്രീയായി താന്‍ തിരിച്ചുവരും. വെള്ളിയാഴ്ച രാത്രി സന്നിധാനത്ത് എത്തിയിരുന്നില്ലെങ്കിലും നട അടച്ചതിനാല്‍ അദ്ദേഹത്തിന് ദര്‍ശനം നടത്താന്‍ കഴിഞ്ഞിരുന്നില്ല. ശനിയാഴ്ച പുലര്‍ച്ചെയാണ് അദ്ദേഹം അയ്യപ്പദര്‍ശനം നടത്തിയത്. വെള്ളിയാഴ്ച രാത്രി 9.15ന് പമ്പയില്‍ എത്തിയ ശ്രീശാന്ത് പമ്പ ഗണപതി കോവിലിലും മറ്റ് ഉപദേവതാ ക്ഷേത്രങ്ങളിലും ഏറെനേരം പ്രാര്‍ഥനാപൂര്‍വ്വം നിന്നു.പിന്നണിഗായകനും സഹോദരീഭര്‍ത്താവുമായ മധു ബാലകൃഷ്ണനും മറ്റ് 21പേരും അടങ്ങിയതായിരുന്നു തീര്‍ഥാടകസംഘം.