സിംബാംബ്വെക്കെതിരായ ഏകദിന പരമ്പരിലെ രണ്ടാം മത്സരത്തിലും ഇന്ത്യയക്ക്‌ തകര്‍പ്പന്‍ ജയം. ഏകദിനത്തില്‍ ശിഖര്‍ ധവാന്റെ മൂന്നാമത്തെ സെഞ്ച്വറിയിലൂടെയാണ്‌ 58 റണ്‍സിന്റെ ജയം ഇന്ത്യ സ്വന്തമാക്കിയത്‌. ഇന്ത്യ മുന്നോട്ടു വച്ച 295 റണ്‍സിന്റെ വിജയലക്ഷ്യം പിന്തുടര്‍ന്നിറങ്ങിയ സിംബാബ്‌വെയ്‌ക്ക്‌ ഒമ്പതു വിക്കറ്റ്‌ നഷ്ടത്തില്‍ 236 റണ്‍സെടുക്കാനേ സാധിച്ചുള്ളൂ. നാല്‌ വിക്കറ്റുകള്‍ വീഴ്‌ത്തിയ ഉനദ്‌ഘടും രണ്ട്‌ വിക്കറ്റുകള്‍ വീഴ്‌ത്തിയ അമിത്‌ മിശ്രയുമാണ്‌ ബൗളിംഗില്‍ തിളങ്ങിയത്‌.

ടോസ്‌ നഷ്ടപ്പെട്ട്‌ ബാറ്റിംഗിനിറങ്ങിയ ഇന്ത്യ ശിഖര്‍ ധവാന്റെ സെഞ്ചുറിയുടെയും (116), ദിനേശ്‌ കാര്‍ത്തിക്കിന്റെ അര്‍ധ സെഞ്ചുറിയുടേയും (69) ബാറ്റിംഗ്‌ മികവില്‍ എട്ടിന്‌ 294 റണ്‍സാണ്‌ അടിച്ചെടുത്തത്‌. ഇരുവര്‍ക്കും പുറമേ 12 പന്തില്‍ 27 റണ്‍സ്‌ അടിച്ചു കൂട്ടിയ വിനയ്‌ കുമാറും ഇന്ത്യയെ മികച്ച സ്‌കോറിലെത്താന്‍ സഹായിച്ചു.

നേരത്തേ 65 റണ്‍സെടുക്കുന്നതിനിടെ നാലു വിക്കറ്റ്‌ നഷ്ടപ്പെട്ട്‌ പരിതാപകരമായ അവസ്ഥയിലായിരുന്നു ഇന്ത്യ. രോഹിത്‌ ശര്‍മ്മ (1), വിരാട്‌ കോഹ്‌ലി (14), അമ്പാട്ടി റായിഡു (5), സുരേഷ്‌ റെയ്‌ന (4) എന്നിവര്‍ നിരാശപ്പെടുത്തി. 115 പന്തില്‍നിന്നായിരുന്നു ധവാന്റെ സെഞ്ചുറി. ഇതോടെ അഞ്ച്‌ മത്സരങ്ങളുള്ള പരമ്പരയില്‍ ഇന്ത്യ 2-0 ത്തിന്‌ മുന്നിലെത്തി.