ഇംഗ്ലണ്ടിനെ ബൗളിംഗ് മികവില്‍ വരിഞ്ഞുകെട്ടി ആദ്യ ഏകദിനത്തില്‍ ഓസ്‌ട്രേലിയ ജയം നേടിയെടുത്തു. ആവേശം നിറഞ്ഞ പോരാട്ടത്തില്‍ 59 റണ്‍സിനായിരുന്നു ഇംഗ്ലണ്ടിന്റെ തോല്‍വി. ഓസ്‌ട്രേലിയയ്ക്കായി വെടിക്കെട്ട് ബാറ്റിംഗ് പുറത്തെടുത്ത വിക്കറ്റ് കീപ്പര്‍ ബാറ്റ്‌സ്മാന്‍ മാത്യു വേഡാണ് (50 പന്തില്‍ പുറത്താകാതെ 71 റണ്‍സ്) കളിയിലെ താരം. സ്‌കോര്‍: ഓസ്‌ട്രേലിയ 50 ഓവറില്‍ ആറിന്് 305, ഇംഗ്ലണ്ട് 45.3 ഓവറില്‍ 246 ഓള്‍ഔട്ട്.
മത്സരത്തില്‍ ടോസ് നേടി ബാറ്റിംഗ് തെരഞ്ഞെടുത്ത ഓസ്‌ട്രേലിയയ്ക്കു ഓപ്പണറുമാരായ ജോ ബേണ്‍സും(44), ഡേവിഡ് വാര്‍ണറും(59) മികച്ച തുടക്കമാണ് നല്‍കിയത്. പിന്നീടെത്തിയ നായകന്‍ സ്റ്റീവ് സ്മിത്ത് (44), ജോര്‍ജ് ബെയ്‌ലി (23), ഗ്ലെന്‍ മാക്‌സ്‌വെല്ല് (15), വാട്‌സണ്‍ എന്നിവര്‍ നിലയുറപ്പിക്കാതെ മടങ്ങിയതോടെ സ്‌കോര്‍ ആറിന് 193 എന്ന നിലയിലെത്തി. എന്നാല്‍ മാത്യു വേഡിനൊപ്പം ഷോണ്‍ മാര്‍ഷ് എത്തിയതോടെ കഥ മാറി. ബൗളര്‍മാരെ കടന്നാക്രമിച്ച ഇരുവരും സ്‌കോര്‍ അതിവേഗം ഉയര്‍ത്തി. മാര്‍ഷ് 34 പന്തില്‍ പുറത്താകാതെ 40 റണ്‍സെടുത്തു. ഏഴാം വിക്കറ്റില്‍ ഇരുവരും കൂട്ടിച്ചേര്‍ത്തത് 111 റണ്‍സാണ്. ഇംഗ്ലണ്ടിനായി ആദില്‍ റഷീദ് നാലു വിക്കറ്റ് വീഴ്ത്തി.

മറുപടി ബാറ്റിംഗില്‍ ഓപ്പണറുമാരായ ജേസണ്‍ റോയിയും (67) അലക്‌സ് ഹെയ്ല്‍സും (22) ശ്രദ്ധയോടാണ് ബാറ്റ് വീശിയത്. ഹെയ്ല്‍സിനെ മിച്ചല്‍ മാര്‍ഷ് വീഴ്ത്തി. ജെയിംസ് ടെയ്‌ലര്‍(49), നായകന്‍ ഇയോണ്‍ മോര്‍ഗന്‍(38) എന്നിവരെ വാട്‌സണും വീഴ്ത്തിയതോടെ ഇംഗ്ലീഷ് ബാറ്റിംഗ് തകര്‍ന്നടിഞ്ഞു. പിന്നാലെയെത്തിയവര്‍ക്കു സ്‌കോര്‍ നിരക്കുയര്‍ത്താനുമായില്ല. ആതിഥേയരുടെ പോരാട്ടം 59റണ്‍സകലെ അവസാനിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha