ശ്രീലങ്കക്കെതിരായ ഏകദിന പരമ്പരയിലെ അവസാന മത്സരത്തില്‍ ദയനീയ പരാജയവുമായി ഇന്ത്യ. 249 റണ്‍സ് വിജയലക്ഷ്യം പിന്തുടര്‍ന്നിറങ്ങിയ ഇന്ത്യയെ ലങ്കന്‍ ബോളര്‍മാര്‍ 138 റണ്‍സില്‍ തളച്ചു.

110 റണ്‍സിനാണ് ഇന്ത്യയുടെ പരാജയം. 5.1 ഓവറില്‍ 27 റണ്‍സ് വഴങ്ങി അഞ്ച് വിക്കറ്റ് പിഴുത ദുനിത് വെല്ലാലഗെയാണ് ഇന്ത്യന്‍ ബാറ്റിങ്‌നിരയെ തകര്‍ത്തത്.

ക്യാപ്റ്റന്‍ രോഹിത് ശര്‍മ (35), വിരാട് കോലി (20), റിയാന്‍ പരാഗ് (15), വാഷിങ്ടണ്‍ സുന്ദര്‍ (30) എന്നിവര്‍ക്കു മാത്രമാണ് രണ്ടക്കം കടക്കാനായത്. സ്‌കോര്‍: ശ്രീലങ്ക - 50 ഓവറില്‍ ഏഴിന് 248, ഇന്ത്യ - 26.1 ഓവറില്‍ 138ന് പുറത്ത്. പ്രതീക്ഷയോടെ കളത്തിലെത്തിയ ശുഭ്മന്‍ ഗില്‍ (6), ഋഷഭ് പന്ത് (6), ശ്രേയസ് അയ്യര്‍ (8), ശിവം ദുബെ (9) എന്നിവരെല്ലാം പരാജയപ്പെടുന്ന കാഴ്ചയാണ് മൂന്നാം ഏകദിനത്തിലുണ്ടായത്.

അവസാനം കളിച്ച ഏകദിന പരമ്പരയില്‍ സെഞ്ച്വറി കണ്ടെത്തിയ മലയാളി താരം സഞ്ജു സാംസണെ മാറ്റിനിര്‍ത്തിയാണ് പന്തിനും ദുബെക്കുമുള്‍പ്പെടെ അവസരമൊരുക്കിയത്. ഇതി വിമര്‍ശനത്തിനിടയാക്കിയേക്കും.