വെസ്റ്റ് ഇന്‍ഡീസും ദക്ഷിണാഫ്രിക്കയും തമ്മിലുള്ള രണ്ടാം ക്രിക്കറ്റ് ടെസ്റ്റ് ആവേശകരമായി. ഒന്നാം ഇന്നിങ്‌സില്‍ ദക്ഷിണാഫ്രിക്ക വെറും 160 റണ്‍സില്‍ ഓള്‍ ഔട്ടായപ്പോള്‍ വിന്‍ഡീസിന്റെ ബാറ്റിങും കൂട്ടത്തകര്‍ച്ചയെ തന്നെ അഭിമുഖീകരിക്കുകയായിരുന്നു.

ഒന്നാം ഇന്നിങ്സില്‍ വിന്‍ഡീസിന്റെ പോരാട്ടം 144 റണ്‍സില്‍ അവസാനിച്ച് ദക്ഷിണാഫ്രിക്ക 16 റണ്‍സ് ലീഡ് സ്വന്തമാക്കി. രണ്ടാം ഇന്നിങ്സ് തുടങ്ങിയ അവര്‍ രണ്ടാം ദിനം കളി നിര്‍ത്തുമ്പോള്‍ 5 വിക്കറ്റ് നഷ്ടത്തില്‍ 223 റണ്‍സെന്ന നിലയിലാണ്. ദക്ഷിണാഫ്രിക്കയ്ക്ക് നിലവില്‍ 239 റണ്‍സ് ലീഡ്. രണ്ടാം ഇന്നിങ്സില്‍ മികച്ച പ്രതികരണമാണ് പ്രോട്ടീസ് നടത്തിയത്. 51 റണ്‍സെടുത്ത ഓപ്പണര്‍ എയ്ഡന്‍ മാര്‍ക്രം 39 റണ്‍സെടുത്ത സഹ ഓപ്പണര്‍ ടോണി ഡി സോര്‍സി എന്നിവര്‍ മികച്ച തുടക്കമാണ് ടീമിനു നല്‍കിയത്.

പിന്നീടെത്തിയ ട്രിസ്റ്റന്‍ സ്റ്റബ്സ് (24), ടെംബ ബവുമ (4), ഡേവിഡ് ബഡിങ്ഹാം (0) എന്നിവരാണ് പുറത്തായ മറ്റുള്ളുവര്‍. നിലവില്‍ അര്‍ധ സെഞ്ച്വറി (50)യുമായി കെയ്ല്‍ വെരെയ്ന്‍, വിയാന്‍ മള്‍ഡര്‍ (34) എന്നിവരാണ് ക്രീസില്‍.

വിന്‍ഡീസിനായി രണ്ടാം ഇന്നിങ്സില്‍ ജയ്ഡന്‍ സീല്‍സ് 3 വിക്കറ്റുകള്‍ വീഴ്ത്തി. ഗുഡാകേഷ് മോട്ടി 2 വിക്കറ്റുകളും സ്വന്തമാക്കി.