ഇന്ത്യ-ന്യൂസീലന്‍ഡ് ടെസ്റ്റ് പരമ്പരയിലെ രണ്ടാം മത്സരം ഇന്ന്. ആദ്യ മത്സരത്തില്‍ ഇന്ത്യയെ എട്ട് വിക്കറ്റിന് തോല്‍പ്പിച്ച ആത്മവിശ്വാസത്തിലാണ് കിവീസിന്റെ വരവ്. 36 വര്‍ഷത്തിന് ശേഷം ഇന്ത്യയില്‍ ടെസ്റ്റ് ജയിക്കാനായത് ന്യൂസീലന്‍ഡിന് വലിയ കരുത്താവുമെന്ന് തന്നെ പറയാം.
ഇന്ത്യയും ന്യൂസീലന്‍ഡും ഇന്ന് രണ്ടാം ടെസ്റ്റിനിറങ്ങുമ്പോള്‍ മത്സരം തുല്യശക്തികളുടെ പോരാട്ടമായി മാറിയിരിക്കുന്നു. പുനെയിലെ മഹാരാഷ്ട്ര ക്രിക്കറ്റ് സ്റ്റേഡിയത്തില്‍ രാവിലെ 9.30-ന് മത്സരം തുടങ്ങും.


ലോക ടെസ്റ്റ് ചാമ്പ്യന്‍ഷിപ്പിന്റെ ഭാഗമാണ് ഈ പരമ്പര. ചാമ്പ്യന്‍ഷിപ്പ് പോയിന്റുപട്ടികയില്‍ ഇപ്പോഴും ഇന്ത്യതന്നെയാണ് മുന്നില്‍. എങ്കിലും ഫൈനല്‍ ഉറപ്പിക്കണമെങ്കില്‍ ഈ പരമ്പരയിലെ ശേഷിക്കുന്ന രണ്ടുമത്സരങ്ങളും ജയിക്കണം. ഇതുകഴിഞ്ഞാല്‍ ഓസ്ട്രേലിയക്കെതിരേ അവരുടെ നാട്ടില്‍ അഞ്ചുടെസ്റ്റ് കളിക്കും. അതോടെ, ടെസ്റ്റ് ചാമ്പ്യന്‍ഷിപ്പ് ഫൈനലിന്റെ ചിത്രം തെളിയും.
അതേസമയം ഇന്ത്യ ആദ്യ മത്സരം തോറ്റതിന് പ്രധാന കാരണം ആദ്യ ഇന്നിങ്സില്‍ നേരിട്ട ബാറ്റിങ് തകര്‍ച്ചയാണ്. രണ്ടാം ഇന്നിങ്സില്‍ ശക്തമായ പ്രകടനം നടത്താന്‍ ഇന്ത്യക്കായിരുന്നു. ഇന്ത്യയുടെ മധ്യനിര ബാറ്റ്സ്മാന്‍മാര്‍ ഫോമിലേക്കെത്തേണ്ടത് അത്യാവശ്യമാണ്. കെ എല്‍ രാഹുലിന്റെ ഫോമാണ് ആദ്യ മത്സരത്തില്‍ ഇന്ത്യക്ക് തിരിച്ചടിയായി മാറിയത്.