ഐ.പി.എല്‍ പൂരത്തിന് കൊടികയറാനായി ദിവസങ്ങള്‍ മാത്രം ബാക്കി നില്‍ക്കെ, രാജസ്ഥാന്‍ റോയല്‍സ് ആരാധകര്‍ക്ക് സന്തോഷ വാര്‍ത്ത! പരിക്കില്‍ നിന്ന് മുക്തരായ നായകന്‍ സഞ്ജു സാംസണും ഓപ്പണര്‍ യശസ്വി ജയ്‌സ്വാളും ആദ്യ മത്സരം കളിക്കാനിറങ്ങും.

ഇരുതാരങ്ങളും ഫിറ്റാണെന്ന് ടീം അറിയിച്ചു. ഈ മാസം 23ന് സണ്‍റൈസേഴ്‌സ് ഹൈദരാബാദിന് എതിരെയാണ് രാജസ്ഥാന്റെ ആദ്യ മത്സരം. ഇംഗ്ലണ്ടിനെതിരായ ട്വന്റി20 പരമ്പരക്കിടെ വലതു കൈയിലെ ചൂണ്ടുവിരലിന് പരിക്കേറ്റ സഞ്ജു ബംഗളൂരുവിലെ ദേശീയ ക്രിക്കറ്റ് അക്കാദമിയില്‍ നിരീക്ഷണത്തിലായിരുന്നു.

താരത്തിന് ബാറ്റ് ചെയ്യാനായി അനുമതി നല്‍കിയെങ്കിലും വിക്കറ്റ് കീപ്പ് ചെയ്യാനാകുമോയെന്ന കാര്യത്തില്‍ അന്തിമ തീരുമാനം തിങ്കളാഴ്ച മാത്രമേ അറിയാനാകു. അതിനുശേഷമായിരിക്കും താരം ടീമിനൊപ്പം ചേരുക. കാല്‍ക്കുഴക്കേറ്റ പരിക്കില്‍ നിന്ന് മുക്തനായ ജയ്‌സ്വാള്‍ കഴിഞ്ഞ ദിവസം ജയ്പൂരിലെ ടീമിന്റെ പരിശീലന ക്യാമ്പില്‍ എത്തിയിട്ടുണ്ടായിരുന്നു. നേരത്തെ, ചാമ്പ്യന്‍സ് ട്രോഫിക്കുള്ള പ്രാഥമിക സ്‌ക്വാഡിലുണ്ടായിരുന്നെങ്കിലും ജയ്‌സ്വാളിനെ അന്തിമ ടീമില്‍നിന്ന് ഒഴിവാക്കി റിസര്‍വ് ലിസ്റ്റിലേക്ക് മാറ്റിയിട്ടുണ്ടായിരുന്നു. പകരം സ്പിന്നര്‍ വരുണ്‍ ചക്രവര്‍ത്തിയാണ് ഇന്ത്യയുടെ അന്തിമ സ്‌ക്വാഡിലെത്തിയത്തിയത്.