128 വര്‍ഷത്തെ ഇടവേളയ്ക്ക് ശേഷം ക്രിക്കറ്റ് ഒളിമ്പിക്സിലേക്ക് തിരിച്ചെത്തുന്നു. 1900ലെ പാരിസ് ഒളിമ്പിക്സില്‍ ക്രിക്കറ്റുണ്ടായിരുന്നു.

ഫ്രാന്‍സും ഗ്രേറ്റ് ബ്രിട്ടനും തമ്മിലായിരുന്നു അന്ന് മത്സരം നടന്നത്. ട്വന്റി20 ഫോര്‍മാറ്റിലായിരിക്കും ഒളിമ്പിക്സിലെ ക്രിക്കറ്റ് മത്സരങ്ങള്‍. പകരക്കാരുള്‍പ്പെടെ 15 പേരുള്‍പ്പെടുന്ന ആറ് വീതം ടീമുകള്‍ വനിതാപുരുഷ വിഭാഗങ്ങളില്‍ മത്സരിക്കും.

ഗെയിംസിന് ആതിഥേയത്വം വഹിക്കുന്ന അമേരിക്കയ്ക്ക് നേരിട്ട് യോഗ്യത ലഭിക്കും. ബാക്കി അഞ്ച് ടീമുകളെ നിശ്ചയിക്കുന്ന യോഗ്യതാ മാനദണ്ഡങ്ങളുടെ അടിസ്ഥാനത്തില്‍ തെരഞ്ഞെടുക്കുകയും ചെയ്യും. പുതുതായി അഞ്ച് ഇനങ്ങളാണ് ഒളിമ്പിക്സില്‍ ഉള്‍പ്പെടുത്തുന്നത്.

ക്രിക്കറ്റിനോടൊപ്പം ബേസ്ബോള്‍, ഫ്‌ലാഗ് ഫുട്ബോള്‍, സ്‌ക്വാഷ്, ലാക്രോസ് എന്നിവയും 2028 ഒളിമ്പിക്‌സില്‍ പുതിയ മത്സരയിനങ്ങളാകും. ക്രിക്കറ്റ് ഗെയിംസിന്റെ ഭാഗമാവുന്നതോടെ ഇന്ത്യയുടെ മെഡല്‍ പ്രതീക്ഷകളുമേറുന്നു.