സച്ചിന്‍ വീണ്ടും ബാറ്റിങ്ങിനൊരുങ്ങുന്നു
രാജ്യത്ത്‌ സാധാരണക്കാരായ ജനങ്ങളുടെ മനസ്സില്‍ സന്തോഷം പകരാനായി ഇന്ത്യയ്‌ക്കുവേണ്ടി ഇനിയും ബാറ്റിങ്ങിന്‌ ഒരുങ്ങുന്നു സച്ചിന്‍ ടെണ്ടുല്‍ക്കര്‍ . രാഷ്‌ട്രപതി പ്രണവ്‌ മുഖര്‍ജിയില്‍ നിന്ന് ഭാരത്‌രത്‌ന ഏറ്റു വാങ്ങിയശേഷം സംസാരിക്കുകയായിരുന്നു അദ്ദേഹം. ക്രിക്കറ്റ് അവസാനിപ്പിച്ചെങ്കിലും ഇന്ത്യയ്‌ക്കുവേണ്ടി ബാറ്റിങ്‌ തുടരും. ജനങ്ങളുടെ മുഖത്ത്‌ പുഞ്ചിരി വിടര്‍ത്താന്‍ എന്നാലാവുന്നതെല്ലാം ചെയ്യും എന്ന്‌ സചിന്‍ പറഞ്ഞു.
ഭാരതരത്‌ന സച്ചിനെ സംബന്ധിച്ച്‌ വലിയ അംഗീകാരമാണെന്നും ഇത് ലഭിച്ചതില്‍ വളരെയേറെ സന്തോഷമുണ്ടെന്നും ഈ രാജ്യത്ത്‌ ജനിക്കാന്‍ സാധിച്ചതില്‍ അഭിമാനമുള്ളതായും ജനങ്ങളോട്‌ അദ്ദേഹം പറഞ്ഞു. വര്‍ഷങ്ങളായി ജനങ്ങള്‍ നല്‍കികൊണ്ടിരിക്കുന്ന സ്‌നേഹവും പിന്തുണയ്‌ക്കും നന്ദി പ്രകടിപ്പിച്ചു. ഇപ്പോള്‍ കിട്ടിയ ഈ പുരസ്‌ക്കാരവും എന്റെ അമ്മയ്ക്കും അതോടൊപ്പം മക്കളുടെ സ്വപ്‌നങ്ങള്‍ പൂവണിയിക്കാന്‍ കൊതിച്ച എല്ലാ അമ്മമാര്‍ക്കും സമര്‍പ്പിക്കുന്നുവെന്നും എടുത്തു പറഞ്ഞു. സച്ചിനോടൊപ്പം ഭാരതരത്‌ന നേടിയ പ്രശസ്‌ത ശാസ്‌ത്രജ്ഞന്‍ പ്രൊഫ.സി.എന്‍.ആര്‍ റാവുവിനേയും അഭിനന്ദിച്ചു. ഭാരതരത്‌ന ഏറ്റുവാങ്ങാനായി ഭാര്യ അഞ്‌ജലി, മകള്‍ സാറ എന്നിവരും കൂടെയുണ്ടായിരുന്നു.
https://www.facebook.com/Malayalivartha
