ഐസിസി ട്വന്റി20 റാങ്കിംഗില്‍ ഇന്ത്യ വീണ്ടും ഒന്നാമതെത്തി. ട്വന്റി20 ലോകകപ്പിലെ മികച്ച പ്രകടനമാണ് ഇന്ത്യയെ റാങ്ക് പട്ടികയില്‍ ഒന്നാമത് എത്തിച്ചിരിക്കുന്നത്. ധാക്കയില്‍ നടക്കുന്ന ട്വന്റി20 ലോകകപ്പില്‍ തുടര്‍ച്ചയായി മൂന്ന് മത്സരങ്ങള്‍ വിജയിച്ചാണ് ഇന്ത്യ സെമി ഫൈനലില്‍ ഇടം നേടിയിരിക്കുന്നത്. ഗ്രൂപ്പ് രണ്ടില്‍ ഏറ്റവും അധികം പോയിന്റും ഇന്ത്യക്ക് തന്നെയാണ്. ആദ്യത്തെ മത്സരത്തില്‍ പാകിസ്ഥാനെയും രണ്ടാമത്തേതില്‍ വെസ്റ്റിന്‍ഡീസിനേയും വെള്ളിയാഴ്‌ച ബംഗ്ലാദേശിനെയുമാണ്‌ ഇന്ത്യ പരാജയപ്പെടുത്തിയത്‌. ഞായറാഴ്‌ച ഇന്ത്യ ഓസ്‌ട്രേലിയയെ നേരിടും.

ഐസിസി പുറത്തിറക്കിയിരിക്കുന്ന റാങ്കിംഗ് പട്ടികയില്‍ രണ്ടാം സ്ഥാനത്ത് ശ്രീലങ്കയാണ്. പാകിസ്ഥാന്‍, സൗത്ത് ആഫ്രിക്ക, വെസ്റ്റിന്‍ഡീസ് എന്നിവരാണ് യഥാക്രമം മൂന്നും നാലും അഞ്ചും സ്ഥാനങ്ങളില്‍ .

ടെസ്റ്റ് റാങ്കിംഗിലാകട്ടെ ഇന്ത്യയുടെ സ്ഥാനം മൂന്നാം സ്ഥാനത്താണ്. സൗത്ത് ആഫ്രിക്കയാണ് ടെസ്റ്റില്‍ ഒന്നാം സ്ഥാനത്ത്. രണ്ടാമത് ഓസ്‌ട്രേലിയ. ഐസിസി ട്വന്റി20 ബാറ്റിംഗ് റാങ്കിംഗില്‍ ഇന്ത്യയുടെ വിരാട് കോഹ്‌ലി നാലാം സ്ഥാനത്തും, സുരേഷ് റെയ്‌ന അഞ്ചാം സ്ഥാനത്തും യുവരാജ് സിംഗ് ആറാം സ്ഥാനത്തുമാണുള്ളത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha