കേരള ബ്ലാസ്റ്റേഴ്സ് ടീമിന്റെ മുഖ്യപരിശീലകനായി ടെറി ഫീലാനെ നിയമിച്ചു
കേരളത്തില്‍ താഴേത്തട്ടില്‍ ഫുട്‌ബോള്‍ വികസിപ്പിക്കാനുള്ള കേരള ബ്ലാസ്റ്റേഴ്സ് എഫ്‌സിയുടെ പദ്ധതിയുടെ ടെക്‌നിക്കല്‍ ഡയറക്ടറും മുന്‍ അയര്‍ലന്‍ഡ് താരവുമായ ടെറി ഫീലാനെ ബ്ലാസ്റ്റേഴ്സ് ടീമിന്റെ മുഖ്യപരിശീലകനായി നിയമിച്ചു. ഐഎസ്എല്ലിലെ മോശം പ്രകടനത്തെത്തുടര്‍ന്നു സ്ഥാനമൊഴിഞ്ഞ പീറ്റര്‍ ടെയ്‌ലര്‍ക്കു പകരമാണു നിയമനം.
ഒരു വര്‍ഷമായി ബ്ലാസ്റ്റേഴ്സ് ഫുട്‌ബോള്‍ സ്‌കൂളില്‍ കുട്ടികളെ പരിശീലിപ്പിക്കുന്ന നാല്‍പത്തെട്ടുകാരനായ ടെറിയുമായി സീസണിന്റെ തുടക്കം മുതല്‍ ബ്ലാസ്റ്റേഴ്സ് കളിക്കാര്‍ക്കു നല്ല ബന്ധമാണുള്ളതെന്ന് സിഇഒ വിരേന്‍ ഡിസില്‍വ പറഞ്ഞു. ബ്ലാസ്റ്റേഴ്സ് ആരാധകര്‍ ആവശ്യപ്പെടുന്ന ആക്രമണ ഫുട്‌ബോളിലേക്കു കളിക്കാര്‍ക്കു വഴിതുറന്നുകൊടുക്കാന്‍ ഫീലാനു കഴിയും. കളിക്കാരനെന്ന നിലയ്ക്കുള്ള അനുഭവസമ്പത്തിനുമപ്പുറം സാങ്കേതികത്തികവുള്ള പരിശീലകന്‍ കൂടിയാണദ്ദേഹമെന്നും ഡിസില്‍വ പറഞ്ഞു. ടെറി ഫീലാന്‍ മുഖ്യപരിശീലകനാകുന്നതോടെ ട്രെവര്‍ മോര്‍ഗന്‍ വീണ്ടും സഹപരിശീലകസ്ഥാനത്തേക്കു മാറും. ചെന്നൈയിന്‍ എഫ്‌സിയുമായി സമനിലയില്‍ പിരിഞ്ഞ മല്‍സരത്തിനു ബ്ലാസ്റ്റേഴ്സ് ടീമിനെ ഒരുക്കിയതു മോര്‍ഗന്‍ ആയിരുന്നു.
ഐഎസ്എല്‍ രണ്ടാം പതിപ്പിലെ ആദ്യ മല്‍സരം ജയിച്ചെങ്കിലും രണ്ടാമത്തെ കളി സമനില വഴങ്ങിയ കേരള ടീം തുടര്‍ച്ചയായ നാലു പരാജയം നേരിട്ടതോടെയാണു ടെയ്‌ലര്‍ സ്ഥാനമൊഴിഞ്ഞത്. താല്‍ക്കാലിക ചുമതലക്കാരനായ ട്രെവര്‍ മോര്‍ഗന്റെ ശിക്ഷണത്തില്‍ മോശമല്ലാത്ത മധ്യനിരക്കളി പുറത്തെടുത്തെങ്കിലും ഗോളവസരങ്ങള്‍ പാഴാക്കിയതിനാല്‍ ചെന്നൈയിനുമായി സമനിലകൊണ്ടു തൃപ്തിപ്പെടേണ്ടിവുന്നു. പുതിയൊരു പരിശീലകന്‍ ഇതാ വരുന്നു എന്ന മട്ടില്‍ ടീം മാനേജ്‌മെന്റ് ദിവസവും സൂചനകള്‍ നല്‍കിക്കൊണ്ടിരുന്നെങ്കിലും പുറത്തുനിന്നൊരാളെ കണ്ടെത്താനാവാഞ്ഞതിനാലാണു ക്യാംപിന്റെ ഭാഗംതന്നെയായ ടെറിക്കു നറുക്കുവീണത്.
നാലാം തീയതി കലൂര്‍ സ്‌റ്റേഡിയത്തില്‍ എഫ്‌സി പുണെ സിറ്റിയുമായാണു ബ്ലാസ്‌റ്റേഴ്‌സിന്റെ അടുത്ത മല്‍സരം. അടുത്ത നാലു വര്‍ഷത്തിനകം ഇന്ത്യയുടെ ദേശീയ ടീമില്‍ പകുതിയിലേറെ മലയാളി താരങ്ങളാവണം എന്ന ലക്ഷ്യത്തോടെയാണു ഫുട്‌ബോള്‍ വികസന പദ്ധതികള്‍ ആവിഷ്‌കരിച്ചതെന്നു ടെറി പറഞ്ഞു. അതുമായി മുന്നോട്ടു പോകവെയാണു പുതിയ ഉത്തരവാദിത്തം ഏറ്റെടുക്കുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
