ഇന്റര്‍ മയാമിയെ തുടര്‍ച്ചയായ രണ്ടാം ഫൈനലിലേക്ക് നയിച്ച് അര്‍ജന്റീന സൂപ്പര്‍ താരം ലയണല്‍ മെസ്സി. യു.എസ് ഓപണ്‍ കപ്പ് സെമി ഫൈനലില്‍ സിന്‍സിനാറ്റി എഫ്.സിയെ പെനാല്‍റ്റി ഷൂട്ടൗട്ടില്‍ മറികടന്നാണ് മെസ്സിയും സംഘവും ഫൈനലിലേക്ക് കടന്നത്.

ഇന്റര്‍ മയാമിക്കായി തുടര്‍ച്ചയായ ഏഴ് മത്സരങ്ങളില്‍ ഗോളടിച്ച മെസ്സിക്ക് ഇത്തവണ ഗോളടിക്കാനായില്ലെങ്കിലും രണ്ട് ഗോളുകള്‍ക്ക് വഴിയൊരുക്കി. നിശ്ചിത സമയത്ത് രണ്ട് ഗോള്‍ വീതമടിച്ചും എക്‌സ്ട്രാ ടൈമില്‍ 3-3നും സമനിലയായ മത്സരത്തിനൊടുവില്‍ ഷൂട്ടൗട്ടില്‍ മയാമി 5-4ന് വിജയം നേടുകയായിരുന്നു. മെസ്സിയായിരുന്നു രണ്ട് ഗോളിന് പിന്നിലായ മയാമിയുടെ ആദ്യ രണ്ട് ഗോളുകള്‍ക്കും വഴിയൊരുക്കിയത് .