ഇന്ത്യന്‍ സൂപ്പര്‍ ലീഗ് സീസണിലെ രണ്ടാംപാദ പോരാട്ടങ്ങള്‍ക്ക് ഇന്ന് തുടക്കം. ഇന്ത്യയില്‍ ഫുട്ബാള്‍ ലീഗ് മത്സരങ്ങള്‍ പുനരാരംഭിക്കുന്നു. ഇന്ത്യന്‍ സൂപ്പര്‍ ലീഗ് സീസണിലെ രണ്ടാംപാദ പോരാട്ടങ്ങള്‍ക്ക് ബുധനാഴ്ചയും ഐ ലീഗിന് വ്യാഴാഴ്ചയും തുടക്കമാവും.

ജാംഷഡ്പുര്‍ എഫ്.സി ആതിഥ്യമരുളുന്ന ഇന്നത്തെ ഐ.എസ്.എല്‍ മത്സരം ഇവര്‍ നോര്‍ത്ത് ഈസ്റ്റ് യുനൈറ്റഡ് എഫ്.സിയെ നേരിടും. രാജസ്ഥാന്‍ യുനൈറ്റഡ് എഫ്.സിയും നാംധാരി എഫ്.സിയും തമ്മിലാണ് ഐ ലീഗില്‍ നാളത്തെ കളി.


ബ്ലാസ്റ്റേഴ്‌സ് നയിക്കുന്ന ഐ.എസ്.എല്‍ പട്ടിക
ഐ.എസ്.എല്‍ പോയന്റ് പട്ടികയില്‍ കേരള ബ്ലാസ്റ്റേഴ്‌സ് എഫ്.സിയാണ് നിലവില്‍ മുന്നില്‍. 12 മത്സരങ്ങളില്‍ മഞ്ഞപ്പടക്കുള്ളത് 26 പോയന്റ്. 10 കളികളില്‍ 24 പോയന്റുള്ള എഫ്.സി ഗോവ കനത്ത ഭീഷണിയാണ് ബ്ലാസ്റ്റേഴ്‌സിന്.

സൂപ്പര്‍ കപ്പില്‍ ദയനീയ പ്രകടനം നടത്തി ഗ്രൂപ് റൗണ്ടില്‍ത്തന്നെ പുറത്തായിരുന്നു ഇവാന്‍ വുകുമനോവിച്ചിന്റെ ശിഷ്യര്‍. ഐ.എസ്.എല്‍ ആദ്യ പാദത്തിലെ മികവ് തുടരാന്‍ കഴിയുമോയെന്ന് കണ്ടറിയണം. വെള്ളിയാഴ്ച ഭുവനേശ്വറില്‍ ഒഡിഷ എഫ്.സിക്കെതിരെ ബ്ലാസ്റ്റേഴ്‌സ് ഇറങ്ങും. ഇന്ന് ഏറ്റുമുട്ടുന്ന നോര്‍ത്ത് ഈസ്റ്റ് (12) ആറും ജാംഷഡ്പുര്‍ (9) 12ഉം സ്ഥാനത്താണ്. പുതിയ പരിശീലകനായ ഖാലിദ് ജമീലിനു കീഴില്‍ സൂപ്പര്‍ ലീഗ് സെമിയിലെത്തിയ ജാംഷഡ്പുര്‍ തിരിച്ചുവരവിന്റെ പ്രതീക്ഷയിലിരിക്കുകയാണ്.