ആവേശകരമായ ഫൈനലില്‍ ജോര്‍ഡനെ 3-1ന് വീഴ്ത്തി ആരാധകര്‍ക്കു നടുവില്‍ ഏഷ്യയുടെ ഫുട്ബാള്‍ രാജകിരീടത്തില്‍ വീണ്ടും ഖത്തറിന്റെ മുത്തം.... സ്വന്തം മണ്ണില്‍ കപ്പുയര്‍ത്തി ഹസന്‍ അല്‍ ഹൈദോസും കൂട്ടുകാരും.

നീളന്‍ചുരുള്‍മുടിയുമായി കളിമൈതാനം അടക്കിവാണ സൂപ്പര്‍താരം അക്രം അഫീഫ് ഹാട്രിക്കുമായി ഫൈനലിലും ആതിഥേയരുടെ വിജയനായകനായി. കളിയുടെ ഇരു പകുതികളിലുമായി മൂന്നു ഗോളുകളും പെനാല്‍റ്റിയിലൂടെയാണ് ഖത്തര്‍ ലക്ഷ്യത്തിലെത്തിച്ചത്.

22, 73, 95 മിനിറ്റുകളില്‍ എതിര്‍ ബോക്‌സുകളിലെ ഫൗളുകള്‍ പെനാല്‍റ്റിയായി മാറിയപ്പോള്‍ അക്രം അഫീഫിന്റെ ഷോട്ടുകളൊന്നും പിഴച്ചില്ല. 67ാം മിനിറ്റില്‍ യാസന്‍ അല്‍ നയ്മതിന്റെ വകയായിരുന്നു ജോര്‍ഡന്റെ ആശ്വാസ ഗോള്‍. 2019ല്‍ യു.എ.ഇയില്‍ നടന്ന ഏഷ്യന്‍ കപ്പിലൂടെ കന്നിക്കിരീടമണിഞ്ഞ ഖത്തര്‍ ഇത്തവണ സ്വന്തം മണ്ണില്‍ ഒരു കളിപോലും തോല്‍ക്കാതെയാണ് കിരീടത്തിലെത്തിയത്. ജോര്‍ഡന്റെ ആദ്യ ഫൈനല്‍ പ്രവേശനമായിരുന്നു.