കേരളത്തിന്റെ അഭിമാനമായ സാജന്‍ പ്രകാശ് ദേശീയ ഗെയിംസിലെ തന്റെ മെഡല്‍ വേട്ട തുടരുന്നു. ഇന്ന് നീന്തല്‍ക്കുളത്തില്‍ നിന്ന് സാജന്‍ ഒരു സ്വര്‍ണം കൂടി നീന്തിയെടുത്തു.

പുരുഷന്‍മാരുടെ 400 മീറ്റര്‍ ഫ്രീസ്‌റ്റൈലിലാണ് സാജന്‍ ആറാം സ്വര്‍ണം നേടിയത്. ഇതോടെ കേരളത്തിന്റെ സ്വര്‍ണനേട്ടം 14 ആയി. കേരളത്തിന്റെ തന്നെ ആനന്ദിനാണ് ഈ ഇനത്തില്‍ വെങ്കലം. കേരളത്തിന്റെ കെ സുരേഷ് കുമാര്‍ 1997 ല്‍ സ്ഥാപിച്ച റെക്കോര്‍ഡാണ് സാജന്‍ ഇന്ന് തകര്‍ത്തത്. 800 മീറ്റര്‍ ഫ്രീസ്‌റ്റൈലിലും സാജന്‍ ദേശീയ റെക്കോഡ് തിരുത്തിയിരുന്നു.

1,500 മീറ്റര്‍ ഫ്രീസ്‌റ്റൈല്‍, 200 മീറ്റര്‍ ബട്ടര്‍ഫ് ളൈ സ്‌ട്രോക്ക്, 100 മീറ്റര്‍ ബട്ടര്‍ഫ് ളൈ സ്‌ട്രോക്ക്, 4100 മീറ്റര്‍ ഫ്രീസ്‌റ്റൈല്‍ റിലേ എന്നിവയാണ് സാജന്‍ സ്വര്‍ണം നേടിയ മറ്റിനങ്ങള്‍. സാജന് നാളെ ഒരു മത്സരം കൂടി ബാക്കിയുണ്ട്.