കിര്‍ഗിസ്താനെ തകര്‍ത്ത് സൗദിയും ഏഷ്യന്‍ കപ്പ് ഫുട്ബാളിന്റെ പ്രീക്വാര്‍ട്ടറിലേക്ക്..
കിര്‍ഗിസ്താനെ തരിപ്പണമാക്കി സൗദിയും ഏഷ്യന്‍ കപ്പ് ഫുട്ബാളിന്റെ പ്രീക്വാര്‍ട്ടറിലേക്ക്. അഹമ്മദ് ബിന്‍ അലി സ്‌റ്റേഡിയത്തില്‍ നിറഞ്ഞു കവിഞ്ഞ സൗദി ആരാധകരുടെ ആരവങ്ങള്‍ക്കുനടുവിലിറങ്ങിയ റോബര്‍ടോ മാന്‍സീനിയുടെ സംഘം മറുപടിയില്ലാത്ത രണ്ട് ഗോളിനാണ് കിര്‍ഗിസ്താനെ വീഴ്ത്തിയത്. തുടര്‍ച്ചയായ രണ്ടാം ജയവുമായി സൗദി പ്രീക്വാര്‍ട്ടര്‍ ഉറപ്പിക്കുകയും ചെയ്തു.
ഗാലറിയെ പാട്ടും വാദ്യമേളങ്ങളും കൊണ്ട് പച്ചക്കടലാക്കിയ സൗദിക്കൊപ്പമായിരുന്നു ആദ്യാവസാനം കളി. ഗോളിനു മുന്നേ ചുവപ്പ് കാര്‍ഡ് പിറന്നതോടെ കിര്‍ഗിസ്താന്‍ തീര്‍ത്തും പ്രതിസന്ധിയിലായി.
ഒമ്പതാം മിനിറ്റില്‍ പ്രതിരോധ താരം അയ്‌സര്‍ അക്മതോവാണ് സൗദിയുടെ സാമി അല്‍ നജിയെ കടുത്ത ടാക്ലിങ്ങിന് വിധേയനാക്കിയതിന് ചുവപ്പുകാര്‍ഡുമായി പുറത്തായത്. പത്തുപേരുമായി പ്രതിരോധം ശക്തമാക്കി കിര്‍ഗിസ്താന്‍ ചെറുത്തു നിന്നെങ്കിലും കോട്ട അധിക നേരം കാത്തുനില്‍ക്കാനായില്ല. കളിയുടെ 35ാം മിനിറ്റില്‍ മുഹമ്മദ് കാനു ആദ്യഗോള്‍ കുറിച്ചു. രണ്ടാം പകുതിയിലെ 52ാം മിനിറ്റില്‍ മറ്റൊരു ഫൗളിലൂടെ കിമി മെര്‍കും പുറത്തായതോടെ കിര്‍ഗിസ്താന്റെ ആള്‍ബലം ഒമ്പതിലേക്ക് ചുരുങ്ങി.
അധികം വൈകാതെയായിരുന്നു രണ്ടാം ഗോളും പിറന്നത്. 84ാം മിനിറ്റില്‍ ഫൈസല്‍ അല്‍ ഗംദിയുടെ വകയായിരുന്നു കിര്‍ഗിസ്താന്‍ വലകുലുക്കിയത്.ഗ്രൂപ്പിലെ മറ്റൊരു മത്സരത്തില്‍ ഒമാനും തായ്‌ലന്‍ഡും ഗോള്‍രഹിത സമനിലയില്‍ പിരിഞ്ഞിട്ടുണ്ടായിരുന്നു.
https://www.facebook.com/Malayalivartha
