ഒളിംപിക്‌സിന് പരിസമാപ്തി... സമാപന മാര്‍ച്ച് പാസ്റ്റില്‍, ഹോക്കിയില്‍ വെങ്കലം നേടിയ ഇന്ത്യന്‍ ടീം ഗോളി പി.ആര്‍.ശ്രീജേഷും ഇരട്ടവെങ്കലം നേടിയ ഷൂട്ടിങ് താരം മനു ഭാക്കറും ഇന്ത്യന്‍ പതാക വഹിച്ച് രാജ്യത്തിന് അഭിമാനമായി
പാരിസിലെ സ്റ്റാഡ് ദ് ഫ്രാന്‍സ് സ്റ്റേഡിയത്തില്‍ 2024 ഒളിംപിക്‌സിന് പരിസമാപ്തിയായി. സമാപന മാര്‍ച്ച് പാസ്റ്റില്‍, ഹോക്കിയില്‍ വെങ്കലം നേടിയ ഇന്ത്യന്‍ ടീം ഗോളി പി.ആര്‍.ശ്രീജേഷും ഇരട്ടവെങ്കലം നേടിയ ഷൂട്ടിങ് താരം മനു ഭാക്കറും ഇന്ത്യന്‍ പതാക വഹിച്ച് രാജ്യത്തിന് അഭിമാനമായി മാറി.
അടുത്ത ഒളിംപിക്‌സിനു വേദിയാകുന്ന ലൊസാഞ്ചലസ് നഗരത്തിന്റെ മേയര്‍ കരന്‍ ബാസ്, പാരിസ് മേയര്‍ ആനി ഹിഡാല്‍ഗോയില്‍നിന്ന് ഒളിംപിക് പതാക ഏറ്റുവാങ്ങി. 2028ലാണ് യുഎസ് നഗരം അടുത്ത ഒളിംപിക്‌സിനു വേദിയാവുക.
ഒളിംപിക്‌സ് ദീപം ഉയര്‍ന്നു കത്തിയ ജാര്‍ഡിന്‍സ് ദെസ് ടുയ്‌ലെറീസിലേക്ക് ഫ്രാന്‍സിന്റെ നീന്തല്‍ താരം ലിയോണ്‍ മെര്‍ച്ചന്റ് കടന്നുവന്നതോടെയാണു പരിപാടികള്‍ക്കു ആരംഭമായത്.
റാന്തലില്‍ ദീപവും കയ്യിലേന്തിയായിരുന്നു താരത്തിന്റെ വരവ്. വിവിധ രാജ്യങ്ങളുടെ പതാകകളുമായി അത്‌ലീറ്റുകള്‍ സ്റ്റേഡിയത്തിലേക്കു പ്രവേശിച്ചു. വനിതാ മാരത്തണില്‍ വിജയിച്ച സിഫാന്‍ ഹസന്‍ (സ്വര്‍ണം), അസഫ ടിസ്റ്റ് (വെള്ളി), ഒബിരി ഹെലന്‍ (വെങ്കലം) എന്നിവര്‍ക്ക് വേദിയില്‍വച്ച് ഐഒഎ ചീഫ് തോമസ് ബാഷ് മെഡലുകള്‍ നല്‍കി. വനിതാ മാരത്തണ്‍ വിജയികള്‍ക്കുള്ള മെഡല്‍ സമര്‍പ്പണച്ചടങ്ങ് സമാപനത്തിന്റെ ഭാഗമായിട്ടാണു പരമ്പരാഗതമായി നടക്കുന്നത്.
ഒളിംപിക്‌സിന്റെ അടുത്ത ആതിഥേയരായ യുഎസിന്റെ ദേശീയ ഗാനം ആലപിച്ചുകൊണ്ടാണ് ഒളിംപിക്‌സ് സമാപനച്ചടങ്ങുകള്‍ അവസാനമായത്.
https://www.facebook.com/Malayalivartha
