ഇന്ത്യന്‍ ഗ്രാന്‍ഡ്മാസ്റ്റര്‍ ദോമ്മരാജു ഗുകേഷ് ലോക ചാംപ്യന്‍ കിരീടം സ്വന്തമാക്കി. ലോക ചെസ് ചാംപ്യന്‍ഷിപ്പിലെ അവസാന ഗെയിമില്‍ നിലവിലെ ചാംപ്യന്‍ കൂടിയായ ചൈനയുടെ ഡിങ് ലിറനെ അട്ടിമറിച്ചാണ് ഇന്ത്യന്‍ താരം കിരീടം ചൂടിയത്. ലോക ചെസ് ചാംപ്യനാകുന്ന പ്രായം കുറഞ്ഞ താരമാണ് പതിനെട്ടുകാരനായ ഗുകേഷ്. അവസാന ഗെയിമില്‍ കറുത്ത കരുക്കളുമായി കളിച്ചാണ് നിലവിലെ ചാംപ്യനെ അട്ടിമറിച്ചതെന്നത് ഗുകേഷിന്റെ നേട്ടത്തിന്റെ തിളക്കം വര്‍ധിപ്പിക്കുന്നു.

ആകെയുള്ള 14 ഗെയിമുകളില്‍നിന്ന് മൂന്നാം ജയം സ്വന്തമാക്കിയ ഗുകേഷ്, 7.5-6.5 എന്ന സ്‌കോറിലാണ് ഡിങ് ലിറനെ വീഴ്ത്തിയത്. 14 ഗെയിമുകളില്‍നിന്ന് ആദ്യം 7.5 പോയിന്റ് സ്വന്തമാക്കുന്നയാളാണ് ലോക ചാംപ്യനാകുക. ഇത്തവണ വാശിയേറിയ പോരാട്ടം 14-ാം ഗെയിമിലേക്ക് എത്തുമ്പോള്‍ 6.5 പോയിന്റ് വീതമായിരുന്നു ഇരുവര്‍ക്കും. മൂന്നാം ഗെയിമും 11-ാം ഗെയിമും ഗുകേഷും ഒന്നാം ഗെയിനും 12-ാം ഗെയിമും ഡിങ് ലിറനും ജയിച്ചപ്പോള്‍, മറ്റു ഗെയിമുകള്‍ സമനിലയില്‍ അവസാനിച്ചു.

ജയിക്കുന്നവര്‍ക്ക് കിരീടം എന്നതായിരുന്നു 14-ാം ഗെയിമിന്റെ ആകര്‍ഷണം. വെള്ളക്കരുക്കളുടെ ആനുകൂല്യവുമായിട്ടായിരുന്നു നിലവിലെ ചാംപ്യന്‍ ഡിങ് ലിറന്റെ കളി. എന്നാല്‍ ഇരുവരും ഒപ്പത്തിനൊപ്പം പോരാടിയതോടെ മത്സരം സമനിലയിലേക്കാണെന്ന തോന്നലുയര്‍ന്നു. ഇതോടെ ഇത്തവണ ലോക ചാംപ്യനെ കണ്ടെത്താന്‍ ടൈബ്രേക്കര്‍ വേണ്ടിവരുമെന്ന് ഉറപ്പിച്ചിരിക്കെയാണ് അവസാന നിമിഷം ഡിങ് ലിറന് സംഭവിച്ച അസാധാരണ പിഴവു മുതലെടുത്ത് ഗുകേഷ് വിജയം പിടിച്ചെടുത്തത്.