കോമണ്‍വെല്‍ത്ത്‌ ഗെയിംസില്‍ വനിതകളുടെ 800 മീറ്ററില്‍ മലയാളി താരം ടിന്റു ലൂക്ക സെമിയില്‍ കടന്നു. മൂന്നാം ഹീറ്റ്‌സില്‍ 2:02.74 സെക്കന്‍ഡില്‍ നാലാമതായാണ്‌ ടിന്റു ഫിനിഷ്‌ ചെയ്‌തത്‌. മയം കുറിച്ച നാല്‌ പേരെക്കൂടി തെരഞ്ഞെടുത്തതോടെയാണു ടിന്റുവും സെമിയിലേക്കു കടന്നത്‌. 36 താരങ്ങള്‍ പങ്കെടുത്ത മത്സരത്തില്‍ ടിന്റു ആറാമതായിരുന്നു. സെമി മത്സരം ഇന്നു നടക്കും.

ലോംഗ്‌ ജമ്പില്‍ മത്സരിച്ച മയൂഖ ജോണിക്കു ഫൈനലില്‍ കടക്കാനായില്ല. യോഗ്യതാ റൗണ്ടില്‍ 6.11 മീറ്റര്‍ ചാടിയ മയൂഖയ്‌ക്ക് എട്ടാം സ്‌ഥാനത്തെത്താനേ കഴിഞ്ഞുള്ളു. ആദ്യ ശ്രമത്തില്‍ ആറു മീറ്റര്‍ കടന്ന മയൂഖ പിന്നീട്‌ 5.89 മീറ്ററാണു ചാടിയത്‌. പുരുഷന്‍മാരുടെ ഡിസ്‌കസ്‌ ത്രോയില്‍ വികാസ്‌ ശിവ ഗൗഡ 64.32 മീറ്റര്‍ എറിഞ്ഞ്‌ ഫൈനലില്‍ കടന്നത്‌ ഇന്ത്യക്ക്‌ മെഡല്‍ പ്രതീക്ഷയായി. ഡല്‍ഹി ഗെയിംസില്‍ വികാസ്‌ വെള്ളി നേടിയിരുന്നു. സൈപ്രസിന്റെ അപോസ്‌തോലസ്‌ പാറെലിസ്‌ (61.91 മീറ്റര്‍), ജമൈക്കയുടെ ചാഡ്‌ റൈറ്റ്‌ (61.08 മീറ്റര്‍) എന്നിവരെ മറികടന്നാണു വികാസിന്റെ മുന്നേറ്റം. 66.28 മീറ്ററാണു ശിവഗൗഡയുടെ ഏറ്റവും മികച്ച ദൂരം. വനിതകളുടെ ഹൈജമ്പില്‍ സഹാന നാഗരാജനും ഫൈനലില്‍ കടന്നു. നാലാമത്തെ അവസരത്തില്‍ 1.81 മീറ്റര്‍ ചാടിയാണു സഹാന ഫൈനലില്‍ കടന്നത്‌. വനിതാ വിഭാഗം ഭാരോദ്വഹനത്തില്‍ (53 കിലോ വിഭാഗം) സ്വര്‍ണം നേടിയ നൈജീരിയയുടെ ചിക അമാലാഹ ഉത്തേജക മരുന്ന്‌ ഉപയോഗിച്ചതായി തെളിഞ്ഞതിനെ തുടര്‍ന്നു മെഡല്‍ തിരിച്ചുവാങ്ങി. അമാലാഹയുടെ മെഡല്‍ തിരിച്ചെടുത്തതോടെ പാപുവ ന്യൂഗിനിയയുടെ ദിക തൗവയ്‌ക്കു സ്വര്‍ണം ലഭിച്ചു. വെങ്കലം നേടിയ ഇന്ത്യയുടെ സന്തോഷി മാത്സയ്‌ക്കു വെള്ളിയും നാലാം സ്‌ഥാനക്കാരിയായ സ്വാതി സിംഗിനു വെങ്കലവും ലഭിച്ചു. സ്വാതി സിംഗിന്റെ വെങ്കല നേട്ടത്തോടെ ഭാരോദ്വഹനത്തില്‍ ഇന്ത്യയുടെ മെഡല്‍ നേട്ടം 12 ലെത്തി. മൂന്നു സ്വര്‍ണവും നാലു വെള്ളിയും അഞ്ചു വെങ്കലവുമാണ്‌ ഇന്ത്യ ഉയര്‍ത്തിയത്‌. 2010 ഗെയിംസിനെക്കാള്‍ രണ്ടു മെഡലുകള്‍ കൂടുതലായി.