തിരുവനന്തപുരം സ്വദേശിയായ മലയാളി താരം എച്ച്‌.എസ്‌ പ്രണോയ്‌ക്ക്‌ അന്താരാഷ്‌ട്ര ബാഡ്‌മിന്റണ്‍ കിരീടം ലഭിച്ചു. പ്രണോയ്‌ കരിയറില്‍ ആദ്യമായാണ്‌ ഗ്രാന്‍ പീ ഗോള്‍ഡ്‌ ബാഡ്‌മിന്റണ്‍ കിരീടം നേടുന്നത്‌. ഫൈനലില്‍ നാട്ടുകാരനായ ഫിര്‍മാന്‍ അബ്‌ദുള്‍ ഖോലിക്കിനെ നേരിട്ടുള്ള ഗെയമുകള്‍ക്കാണു പ്രണോയ്‌ തോല്‍പ്പിച്ചത്‌. സ്‌കോര്‍ 21-11,22-20. മത്സരം 45 മിനിറ്റ്‌ നീണ്ടു.
പ്രണോയ്‌ക്ക്‌ 75 ലക്ഷം രൂപയാണ്‌ സമ്മാനത്തുകയായി ലഭിച്ചത്‌. ഫിര്‍മാന്‍ അബ്‌ദുള്‍ ഖോലികിനെതിരെ തുടക്കം മുതല്‍ ആധിപത്യം നിലനിര്‍ത്താന്‍ പ്രണോയിക്കു കഴിഞ്ഞു. നേരിട്ടുള്ള അഞ്ചു പോയിന്റുകളോടെ പ്രണോയ്‌ ഒന്നാം ഗെയിം നേടി. രണ്ടാം ഗെയിമില്‍ ഫിര്‍മാന്‍ മികച്ച പോരാട്ടം പ്രദര്‍ശിപ്പിച്ചു. 5-3 നു ലീഡ്‌ നേടിയ ഫിര്‍മാന്‍ പോരാട്ടം ദീര്‍ഘിപ്പിച്ചു. സ്‌കോര്‍ 6-6 ന്‌ സമനിലയിലാക്കിയ പ്രണോയി 9-7 ന്റെ ലീഡ്‌ നേടി.
തുടര്‍ച്ചയായി പോയിന്റ്‌ നേടിയ ഫിര്‍മാന്‍ 12-9 ലെത്തിയെങ്കിലും നാലു മാച്ച്‌ പോയിന്റുകളുമായി പ്രണോയ്‌ തിരിച്ചടിച്ചു. സ്‌കോര്‍ 20-20 എന്ന നിലയിലാക്കാന്‍ കഴിഞ്ഞെങ്കിലും തുടര്‍ന്നു മുന്നേറാന്‍ ഫിര്‍മാനു കഴിഞ്ഞില്ല. തുടരെ രണ്ടു പോയിന്റ്‌ നേടി പ്രണോയ്‌ ആദ്യ കിരീടം ചൂടി.
തിരുവനന്തപുരം ആനയറ സ്വദേശിയായ പ്രണോയ്‌ ഐഎസ്‌ആര്‍ഒയില്‍ ഉദ്യോഗസ്ഥരായ സുനില്‍കുമാറിന്റെയും ബി.എസ്‌ ഹസീനയുടെയും മകനാണ്‌.