പി ആര്‍ ശ്രീജേഷിന് വേള്‍ഡ് ഗെയിംസ് അത്ലറ്റ് ഒഫ് ദ ഇയര്‍ പുരസ്കാരം; വോട്ടെടുപ്പിൽ മറ്റ് എതിരാളികളെ ബഹുദൂരം പിന്നിലാക്കി താരം
ദേശീയ ഹോക്കി ടീം ഗോള്‍കീപ്പറും മലയാളിയുമായ പി ആര്‍ ശ്രീജേഷിന് വേള്‍ഡ് ഗെയിംസ് അത്ലറ്റ് ഒഫ് ദ ഇയര്‍ പുരസ്കാരം. കഴിഞ്ഞ വര്‍ഷം രാജ്യാന്തര രംഗത്ത് കൈവരിച്ച നേട്ടങ്ങളെ മുന്‍നിര്‍ത്തി പൊതുജന വോട്ടിംഗിലൂടെയാണ് ശ്രീജേഷിന് പുരസ്കാരം ലഭിച്ചത്. ഈ നേട്ടം കൈവരിക്കുന്ന രണ്ടാമത്തെ ഇന്ത്യന്‍ കായികതാരമാണ് ശ്രീജേഷ്. ദേശീയ വനിതാ ഹോക്കി ക്യാപ്ടനായ റാണി റാംപാലാണ് ഈ നേട്ടം സ്വന്തമാക്കിയ ആദ്യ ഇന്ത്യന്‍ കായികതാരം.
വോട്ടിംഗ് പാതിവഴിയില്‍ എത്തിയപ്പോള്‍ തന്നെ ശ്രീജേഷ് മറ്റ് എതിരാളികളേക്കാളും ബഹുദൂരം മുന്നിലെത്തിയിരുന്നു. ഇന്നലെ അന്തിമ കണക്കെടുപ്പ് നടത്തിയപ്പോള്‍ രണ്ടാം സ്ഥാനത്തെത്തിയ സ്പെയിനിലെ ക്ലൈമ്ബിംഗ് താരം ആല്‍ബര്‍ട്ടോ നെസ് ലോപസ് നേടിയതിന്റെ ഇരട്ടിയിലേറെ വോട്ടുകള്‍ ശ്രീജേഷ് സ്വന്തമാക്കിയിരുന്നു. ഇറ്റലിയുടെ വുഷു താരം മിഷേല്‍ ജിയോ‌ര്‍ദാനോയ്ക്കാണ് മൂന്നാം സ്ഥാനം.
ടോക്കിയോ ഒളിംപിക്‌സില്‍ ഇന്ത്യന്‍ പുരുഷ ഹോക്കി ടീം വെങ്കല മെഡല്‍ നേടിയപ്പോള്‍ നിര്‍ണായകമായത് ശ്രീജേഷ് ഗോള്‍ പോസ്റ്റിന് കീഴില്‍ നടത്തിയ പ്രകടനമായിരുന്നു. 1980ന് ശേഷം ആദ്യമായാണ് ഹോക്കിയില്‍ ഇന്ത്യ ഒളിംപിക് മെഡല്‍ നേടിയത്. ജര്‍മനിക്കെതിരായ വെങ്കല മെഡല്‍ മത്സരത്തില്‍ കളി അവസാനിക്കാന്‍ ആറ് സെക്കന്‍ഡ് മാത്രം ബാക്കിനില്‍ക്കേ മികച്ചൊരു സേവുമായി ശ്രീജേഷ് ഇന്ത്യക്ക് വിജയം സമ്മാനിക്കുകയായിരുന്നു.
https://www.facebook.com/Malayalivartha
