ഇന്ത്യന്‍ ക്രിക്കറ്റ് ടീം ക്യാപ്ടന്‍ എം.എസ് ധോനിയുടെ ആദ്യ കാമുകിക്ക് എന്ത് സംഭവിച്ചു? ധോനിയുടെ ആത്മകഥ പറയുന്ന എം.എസ് ധോനി അണ്‍ടോള്‍ട് സ്‌റ്റോറി എന്ന ചിത്രത്തിലാണ് ധോനിയുടെ ആദ്യ കാമുകിയെ കുറിച്ച് പറയുന്നത്. ആദ്യത്തെ ക്രിക്കറ്റ് സീരീസ് കഴിഞ്ഞ് വിമാനത്തില്‍ മടങ്ങുമ്പോള്‍ ഒരു പെണ്‍കുട്ടി സച്ചിന്റെ ഓട്ടോഗ്രാഫ് വാങ്ങിത്തരാന്‍ ധോനിയോട് അഭ്യര്‍ത്ഥിച്ചു. പ്രിയങ്ക ഝാ എന്നായിരുന്നു ആ സുന്ദരിയുടെ പേര്. ഓട്ടോഗ്രാഫ് വാങ്ങിക്കൊടുത്ത അവള്‍ ധോനിയോട് താങ്കളുടെ പേരെന്താണ്, എനിക്ക് താങ്കളെ അറിയില്ലെന്ന് പറഞ്ഞു. നിങ്ങള്‍ എന്നെ അറിയാന്‍ മാത്രം ഞാന്‍ ഒന്നും ചെയ്തിട്ടില്ലെന്നായിരുന്നു താരത്തിന്റെ മറുപടി. നാല് കളികളില്‍ നിന്ന് നാലും 12ഉം, മൂന്നും റണ്‍സുകളും ഒരു തവണ ഡക്കുമായിരുന്നെന്നും ധോനി പറഞ്ഞു. പക്ഷെ, പേര് പറഞ്ഞില്ല.

നിങ്ങള്‍ അടുത്ത കളിയില്‍ സെഞ്ച്വറിയടിക്കുമെന്ന് പ്രിയങ്ക പറഞ്ഞു. എന്നിട്ട് അവളുടെ വിസിറ്റിംഗ് കാര്‍ഡും നല്‍കി. അടുത്ത കളിയില്‍ സെഞ്ചറിയടിച്ച ധോനി തന്റെ അച്ഛനെ വിളിച്ച ശേഷം പ്രിയങ്കയെ വിളിച്ചു. എം.എസ് ധോനി ജി ഞാന്‍ കളികണ്ടെന്ന് പറഞ്ഞു. ഡല്‍ഹി സ്വദേശിയായ പ്രിയങ്കയുമായി ധോനി പ്രണയത്തിലായി. താമസിക്കുന്ന ഹോട്ടലിലെ ജീവനക്കാരന്റെ ബൈക്ക് വാങ്ങി ഹെല്‍മറ്റ് ധരിച്ചാണ് ധോനി ആദ്യമായി പ്രിയങ്കയെ കാണാന്‍ പോയത്. ആദ്യം ഏതോ പൂവാലനാണെന്നാണ് പ്രിയങ്ക കരുതിയത്. എന്നാല്‍ ഹെല്‍മറ്റ് മാറ്റിയതോടെ അവള്‍ ശരിക്കും ഞെട്ടിപ്പോയി. ഇരുവരും ഡല്‍ഹിയില്‍ പലയിടത്തും കറങ്ങാന്‍ പോയി.

ഒരു വാലന്റയിന്‍ ദിനത്തില്‍ തനിക്ക് എന്ത് തരുമെന്ന് പ്രിയങ്ക ധോനിയോട് ചോദിച്ചു. പാക്കിസ്ഥാനില്‍ ഏകദിന പരമ്പരയ്ക്ക് പോയിരുന്ന ധോനി അവള്‍ക്ക് വേണ്ടി ഹോട്ടലിലെ ഒരു ഷോപ്പില്‍ നിന്ന് എന്തോ ഒന്ന് വാങ്ങി. തിരിക്കുന്നതിന് മുമ്പ് പലതവണ പ്രിയങ്കയെ വിളിച്ചിട്ടും കിട്ടിയില്ല. അങ്ങനെ പരമ്പര കഴിഞ്ഞ് ധോനി റാഞ്ചി വിമാനത്താവളത്തില്‍ ഇറങ്ങിയപ്പോള്‍ സുഹൃത്തുക്കളെല്ലാം ഉണ്ടായിരുന്നു. പ്രിയങ്കയെ കുറിച്ച് ചോദിച്ചപ്പോഴാണ് അവള്‍ കാറപകടത്തില്‍ മരിച്ചെന്ന് അറിഞ്ഞത്. അതറിഞ്ഞ് അലറിവിളിച്ച് കരഞ്ഞ ധോനി രണ്ട് വര്‍ഷം കൊണ്ടാണ് പ്രിയങ്കയുടെ ഓര്‍മകളില്‍ നിന്ന് മുക്തനായത്.