മൊബൈല്‍ ഫോണ്‍ ഇല്ലാത്ത ആളുകള്‍ ചുരുക്കമാണ്. ഇപ്പോൾ മൊബൈൽ ഫോൺ മിക്കവർക്കും ശരീരത്തിന്റെ ഒരു ഭാഗമായി കഴിഞ്ഞിരിക്കുന്നു. യാത്രക്കിറങ്ങുമ്പോൾ മൊബൈൽ എടുക്കാൻ മറന്നു പോയാൽ പിന്നത്തെ കാര്യമൊന്നും പറയണ്ട. ഇത് സാധാരണക്കാരനായാലും അമേരിക്കൻപ്രസിഡന്റായാലും ഒരുപോലെ തന്നെ.
പ്രസിഡന്റ് കാലാവധി അവസാനിക്കാറായ ബരാക്ക് ഒബാമ ഇപ്പോള്‍ സോഷ്യല്‍ മീഡിയകളില്‍ തരംഗമായിക്കൊണ്ടിരിക്കുകയാണ്. യാത്രയ്ക്കിറങ്ങിയപ്പോള്‍ മറന്നു വെച്ച മൊബൈലിനായി തിരിച്ചോടുന്ന ഒബാമയുടെ വീഡിയോയാണ് ഇപ്പോള്‍ പുറത്തു വന്നിരിക്കുന്നത്. വൈറ്റ് ഹൗസില്‍ നിന്നിറങ്ങി വരികയായിരുന്നു ഒബാമ. തന്നെ കാത്തുനില്‍ക്കുന്നവരെ കൈവീശിക്കാണിച്ച് മുന്നോട്ട് നീങ്ങവെ പതിയെ പോക്കറ്റില്‍ ഒന്നു കൈയ്യിട്ടു നോക്കി. അപ്പോഴാണ് ആ സത്യം മനസിലാക്കിയത്. മൊബൈല്‍ എടുത്തിട്ടില്ല. പിന്നെ തിരിഞ്ഞു ഒരോട്ടമായിരുന്നു.
ചിക്കാഗോയിലേക്ക് യാത്രാപോകാനായി ഇറങ്ങിയപ്പോഴാണ് ഒബാമ മൊബൈല്‍ മറന്ന് വെച്ചത്. തിരിച്ചുവന്ന് വിമാനത്തില്‍ കയറുന്നത് വരെയുള്ള ദൃശ്യങ്ങളാണ് വീഡിയോയില്‍ ഉള്ളത്.