മണ്ഡലകാല പൂജയ്ക്ക് ഇനി ആഴ്ചകള്‍ മാത്രം ബാക്കി നില്‍ക്കെ സന്നിധാനത്ത് ഭക്തജനത്തിരക്കേറുന്നു. വ്യാഴം, വെള്ളി ദിനങ്ങളില്‍ 90,000 പേരാണ് വെര്‍ച്ചല്‍ ക്യൂ വഴി ദര്‍ശനത്തിന് ബുക്ക് ചെയ്തിരിക്കുന്നത്. കൂടാതെ 10,000 പേരുടെ സ്‌പോട്ട് ബുക്കിങ് കൂടി ആകുമ്പോള്‍ ഒരു ലക്ഷത്തോളം ഭക്തരാവും സന്നിധാനത്ത് ദര്‍ശനത്തിനായി എത്തുക.

കാനന പാതയിലൂടെ കടന്ന് വരുന്നവരുടെ എണ്ണം വര്‍ദ്ധിച്ചാല്‍ തിരക്കിന്റെ ദിനങ്ങളാവും കടന്നുവരിക. തിരക്ക് കണക്കിലെടുത്ത് ദേവസ്വം ബോര്‍ഡും പൊലീസും വേണ്ട ക്രമീകരണങ്ങള്‍ നടത്തിയിട്ടുണ്ടെന്ന് അധികൃതര്‍ .

മരക്കൂട്ടത്തിനും ശരംകുത്തിക്കും മധ്യയുള്ള ക്യു കോംപ്ലക്‌സുകളില്‍ തീര്‍ഥാടകര്‍ക്ക് വിശ്രമിക്കാനും പ്രാഥമിക ആവശ്യത്തിനുള്ള സൗകര്യങ്ങളും ഏര്‍പ്പെടുത്തിയിട്ടുണ്ട്.

തിരക്ക് കണക്കിലെടുത്ത് പമ്പ മുതല്‍ സന്നിധാനം വരെയുള്ള പാതകളിലെ ക്രമീകരണങ്ങള്‍ ഏര്‍പ്പെടുത്താന്‍ കഴിയുന്ന കണ്‍ട്രോള്‍ റൂം ക്യൂ കോംപ്ലക്‌സിന്റെ ഉദ്ഘാടനം ബുധനാഴ്ച തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി.എസ്. പ്രശാന്ത് നിര്‍വഹിച്ചിരുന്നു.

കൂടാതെ ഒരേ സമയം 20 സ്ഥലങ്ങളിലെ ക്യാമറ ദൃശ്യങ്ങള്‍ കാണുന്നതിനുള്ള സംവിധാനവും കണ്‍ട്രോള്‍ റൂമില്‍ ഒരുക്കിയിട്ടുണ്ട്. മിഗ്‌ജോം ചുഴലിക്കാറ്റിന്റെ പശ്ചാത്തലത്തില്‍ തമിഴ്‌നാട് അടക്കമുള്ള സംസ്ഥാനങ്ങളില്‍ നിന്നുള്ള ട്രെയിന്‍ ഗതാഗതം തടസ്സപ്പെട്ടതിനാല്‍ കഴിഞ്ഞ ദിവസം തിരക്ക് വളരെ കുറവായിരുന്നു .