ആറ്റുകാല്‍ ഭഗവതി ക്ഷേത്ര നടയില്‍ ഇന്ന് മേള പ്രമാണിയായി നടന്‍ ജയറാം കൊട്ടിക്കയറും. ചെണ്ട, കൊമ്പ്, കുഴല്‍, ചേങ്ങില... എന്നിവയിലായി നൂറു കലാകാരന്മാരുടെ അധിപനായാണ് ജയറാം എത്തുന്നത്. നടന്‍ ജയറാമും 101 കലാകാരന്മാരും ചേര്‍ന്ന് അവതരിപ്പിക്കുന്ന പഞ്ചാരിമേളം ഇന്ന് വൈകുന്നേരം 6-ന് ക്ഷേത്രത്തിനു മുന്നില്‍ അരങ്ങേറും.

ആറ്റുകാല്‍ ക്ഷേത്ര നടയില്‍ പഞ്ചാരിമേളം അവതരിപ്പിക്കാന്‍ അവസരം ലഭിക്കുന്നത് മഹാഭാഗ്യമാണെന്ന് ജയറാം .ലോക പ്രസിദ്ധമാണ് ആറ്റുകാല്‍ പൊങ്കാല. ഇത്രമേല്‍ ചിട്ടയോടു കൂടി നടക്കുന്ന സ്ത്രീകളുടെ ആഘോഷം. അത് പറഞ്ഞറിയിക്കാന്‍ പറ്റുന്നതിലും അപ്പുറമാണ്. തൃശൂര്‍ പൂരം കണ്ടറിയണം, കൊണ്ടറിയണം എന്നു പറയുന്നതുപോലെയാണ് ആറ്റുകാല്‍ പൊങ്കാലയും.നമ്മുടെ സര്‍ക്കാരും ജനങ്ങളും തിരുവനന്തപുരത്തെ ഓരോ വീട്ടുകാരും സന്നദ്ധ സംഘടനാ പ്രവര്‍ത്തകരുമെല്ലാം ഒരേ മനസോടെ ഒത്തു ചേരുന്ന മഹാസംഭവമാണ് ആറ്റുകാല്‍ പൊങ്കാല.

മറ്റ് ക്ഷേത്രങ്ങളിലെ രീതിയിലല്ല, ആറ്റുകാലില്‍ പഞ്ചാരിമേളം അവതരിപ്പിക്കുന്നത്. സാധാരണ ക്ഷേത്രങ്ങളില്‍ നാലുകാലം കൊട്ടി അഞ്ചാം കാലത്തില്‍ ക്ഷേത്രത്തിനു വലം വച്ച് ചെമ്പട കൊട്ടി കലാശം കൊട്ടി തീരുന്ന മേളമാണ് അവതരിപ്പിക്കുക. ഇവിടെ ക്ഷേത്രമുറ്റത്ത് നിന്നു കൊണ്ട് മേളമൊരുക്കും.

അതേസമയം ഇന്നു മുതല്‍ പൊങ്കാലനാള്‍വരെ തിരക്കു കൂടുമെന്നാണ് പ്രതീക്ഷിക്കുന്നത്. മണക്കാട് ശാസ്താക്ഷേത്രത്തില്‍നിന്ന് ആറ്റുകാലിലേക്കുള്ള എഴുന്നള്ളത്ത് ഇന്ന് നടക്കും.

മണക്കാട് ശാസ്താക്ഷേത്രത്തില്‍ വെള്ളിയാഴ്ച ഉത്സവത്തിനു കൊടിയേറി. ആറ്റുകാലമ്മയുടെ സഹോദരനെന്നു വിശേഷണമുള്ള മണക്കാട് ശാസ്താവിന്റെ ആചാരപരമായ എഴുന്നള്ളത്തിനെ ക്ഷേത്രവും ഭക്തരും വരവേല്‍ക്കുന്നതാണ്.