സഹയാത്രികയോട് കെഎസ്ആർടിസി ബസിൽ വെച്ച് മോശമായി പെരുമാറുകയും തൊട്ടരുകിലിരുന്ന് സ്വയംഭോഗം ചെയ്യുകയും ചെയ്ത സംഭവത്തില് യുവാവ് അറസ്റ്റിൽ. കോഴിക്കോട് കായക്കൊടി കാവില്‍ സവാദി (27) നെ നാട്ടുകാരും ബസ് ജീവനക്കാരും ചേര്‍ന്നാണ് പിടികൂടി പോലീസില്‍ ഏല്‍പ്പിച്ചത്. ചൊവ്വാഴ്ച ഉച്ചയോടെ ദേശീയപാതയില്‍ അത്താണിയിലാണ് സംഭവം. സിനിമാപ്രവര്‍ത്തകയായ തൃശ്ശൂര്‍ സ്വദേശിനി ഷൂട്ടിങ്ങിനായി കെ.എസ്.ആര്‍.ടി.സി. ബസില്‍ എറണാകുളത്തേക്ക് പോവുകയായിരുന്നു.

അങ്കമാലിയില്‍ നിന്നാണ് സവാദ് ഈ ബസില്‍ കയറിയത്. മൂന്നുപേര്‍ക്ക് ഇരിക്കാവുന്ന സീറ്റില്‍ പരാതിക്കാരിക്കും മറ്റൊരു സ്ത്രീക്കും ഇടയിലാണ് സവാദ് ഇരുന്നത്. ബസ് അങ്കമാലിയില്‍നിന്ന് പുറപ്പെട്ടതോടെ യുവാവ് മോശമായി പെരുമാറാന്‍ തുടങ്ങി. തുടര്‍ന്ന് സവാദ് നഗ്‌നത പ്രദര്‍ശിപ്പിക്കാന്‍ ശ്രമിച്ചതോടെ യുവതി സീറ്റില്‍നിന്ന് ചാടി എഴുന്നേറ്റു. പെട്ടെന്ന് അത്താണി സിഗ്‌നലില്‍ ബസ് നിര്‍ത്തിയപ്പോള്‍ സവാദ് പുറത്തേക്ക് ഇറങ്ങിയോടി.

പിന്നാലെ ഓടിച്ചെന്ന് കണ്ടക്ടര്‍ പിടിച്ചെങ്കിലും സവാദ് കുതറിഓടി. ഇതോടെ നാട്ടുകാരും യാത്രക്കാരും ചേര്‍ന്ന് സവാദിനെ പിടികൂടി നെടുമ്പാശ്ശേരി പോലീസില്‍ ഏല്‍പ്പിച്ചു. സംഭവത്തിന്റെ എല്ലാ വീഡിയോ സഹിതം യുവതി സോഷ്യല്‍ മീഡിയയില്‍ പങ്കുവച്ചു.

കൂടാതെ താൻ നേരിടേണ്ടിവന്ന മോശം അനുഭവത്തെക്കുറിച്ചും തുറന്നു പറച്ചിൽ നടത്തിയിട്ടുണ്ട്. ദൃശ്യങ്ങൾ വൈറലാണ്. സവാദ് യൂത്ത് ലീഗ് പ്രവർത്തകനാണെന്നാണ് ആരോപണം.